Agjencia gjermane e spiunazhit ‘beson se COVID-19 ka të ngjarë të ketë filluar në laborator’

Shërbimi i inteligjencës së jashtme të Gjermanisë besonte se kishte një shans 80-90% që coronavirusi të dilte aksidentalisht nga një laborator kinez, thonë mediat gjermane.

Dy gazeta gjermane thonë se kanë zbuluar detaje të një vlerësimi të kryer nga agjencia e spiunazhit BND në vitin 2020, por që nuk u publikua kurrë.

Shërbimi i inteligjencës kishte indikacione se Instituti i Virologjisë në Wuhan kishte kryer eksperimente ku viruset modifikohen për t’u bërë më të transmetueshëm te njerëzit për kërkime, thonë ata, shkruajnë mediat e huaja, përcjell Telegrafi.

Kina përsëriti mohimin e saj duke thënë se shkaku “duhet të përcaktohet nga shkencëtarët” – dhe vuri në dukje një hetim të Organizatës Botërore të Shëndetësisë që zbuloi se teoria e rrjedhjes së laboratorit ishte “jashtëzakonisht e pamundur”.

Megjithatë, nuk ka konsensus për shkakun e pandemisë së shkaktuar nga COVID-19.

Hipoteza e rrjedhjes së laboratorit është kundërshtuar ashpër nga shkencëtarët, duke përfshirë shumë që thonë se nuk ka prova përfundimtare për ta mbështetur atë.

Por teoria dikur e diskutueshme po fiton terren në mesin e disa agjencive të inteligjencës – dhe BND është e fundit që e ka mbështetur këtë teori.

Në janar, CIA e SHBA-së tha se coronavirusi kishte “më shumë gjasa” të kishte rrjedhur nga një laborator sesa të kishte ardhur nga kafshët. /Telegrafi/