Abdixhiku: Ekipi i dialogut me nipër, dajë e akraba u zhbë

Deputeti i LDK-së, Lumir Abdixhiku, ka thënë se me inicitativë të përbashkët LDK-së dhe VV-së, ekipi negociator u shpall kundërkushtetues.

Në një postim në llogarinë e tij në Facebook, ai ka shkruar se ekipi me nipër, dajë e akraba u zhbë.

Lexo po ashtu Kushtetuesja aprovon kërkesën e LDK-së dhe VV-së: Ekipi negociator është antikushtetues

Sipas tij, dialogu nuk mund të udhëhiqet nga askush tjetër veçse nga Qeveria.

“Gjashtë muaj më parë, Ekipi Negociator i ishte kushtëzuar me votimin e buxhetit. Votimi i buxhetit i siguronte jetë Qeverisë PAN. Mosvotimi i tij nënkuptonte fund të skenës më të rëndë politike në vend. Buxheti ishte votuar. Në këmbim ishte ndërtuar një ekip me dhjetë burra e ca, që thonin se përfaqësonin Kosovën. Të dhjetë burrat bashkë s’përfaqësonin as 5-6% qytetarë. Kjo për ta kishte pak rëndësi.

Gjashtë muaj më pas – me inicitativë të përbashkët LDK dhe VV – siç dhe pritej nga secili me minimalisht dije për shtet, Ekipi Negociator u shpall kundërkushtetues. Dialogu s’mund të kontraktohet. Dialogu s’mund të delegohet. Dialogu s’mund të udhëhiqet nga askush tjetër veçse nga Qeveria. Shteti s’është punë axhamizmi politik. Punët e shtetit megjithatë kanë një rend.

Ekipi u zhbë. Me të dhe ekipet me nipër, dajë e akraba. Jokushtetues të gjithë. Por Kosovës i mbetet ende Qeveria PAN. Kjo njollë kapjeje do të harrojej tashmë po të mos votohej buxheti gjashtë muaj më parë. Sot Kosova do të kishte një Qeveri të re që s’fshihet rrugicave të Evropës në takim me Serbinë, por që e ballafaqon atë mençur e botërisht”, ka shkruar në Facebook, Abdixhiku.

Kurse deputetja e Lëvizjes Vetëvendosje, Albulena Haxhiu, ka thënë se LVV e konsideron të drejtë aktgjykimin e Gjykatës Kushtetuese e cila ka vlerësuar se është pranuar kërkesa e bërë nga deputetët e opozitës, Lidhjes Demokratike të Kosovës dhe Vetëvendosjes për Ligjin për Dialogun.

Lexo po ashtu Haxhiu: Aktgjykimi i Kushtetueses për Ligjin e Dialogut është i drejtë, zgjidhja e vetme janë zgjedhjet

Haxhiu  theksoi se LVV ka kundërshtuar edhe mënyrën se si ka shkuar procesi i dialogut.

Nërsa Gjykata Kushtetuese ka vlerësuar se kërkesa e bërë nga deputetë është pranuar, dhe se delegacioni shtetëror i cili është themeluar me Ligjin e kontestuar nuk është i paraparë me Kushtetutë dhe nuk i është paraparë brenda formës së qeverisjes dhe ndarjes së pushtetit./Telegrafi/