Ligjvënësit në Mexico City ndalojnë ndeshjet e dhunshme me dema – duke shkaktuar zemërim dhe festime

Ligjvënësit në Mexico City kanë votuar me shumicë dërrmuese për ndalimin e ndeshjeve të dhunshme me dema, duke shkaktuar zemërim nga “adhuruesit” dhe festime nga avokatët e të drejtave të kafshëve.

Legjislacioni, i miratuar me 61-1 vota, ndalon vrasjen e demave dhe përdorimin e objekteve të mprehta që mund të dëmtojnë kafshët.

Ai gjithashtu përcakton kufijtë kohorë për sa kohë mund të qëndrojnë demat në ring, të gjitha pjesë e një nisme të quajtur ‘luftim me dema pa dhunë’.

Kryetarja e qytetit të Meksikos, Clara Brugada, e partisë qeverisëse Morena, u bëri jehonë aktivistëve duke thënë se vendimi do ta kthente kryeqytetin meksikan në një vend “që respekton të drejtat e kafshëve”.

Shoqata Kombëtare e Mbarështuesve të Demave Luftues në Meksikë thotë se lufta me dema krijon 80,000 vende pune direkte dhe 146,000 vende pune indirekte në të gjithë vendin.

Në përgjithësi, industria gjeneron rreth 400 milionë dollarë (367 milionë euro) në vit.

Të martën, në një fjalim përpara kongresit të qytetit, ligjvënësi i Partisë së Gjelbër Jesús Sesma pranoi se vendimi do të zemëronte një segment të popullsisë së qytetit.

“Për ato familje që ndihen të frustruar sot, ne jemi këtu për t’u thënë se askush nuk e humbi punën”, tha ai.

“Kishte një rrugë të mesme për të vazhduar me këto spektakle me dema, por tani pa dhunë”. /Telegrafi/