Izraeli u konsultua me SHBA-në për sulmet në Gaza, thotë zëdhënësja e Shtëpisë së Bardhë

Administrata e presidentit Donald Trump u konsultua të hënën nga Izraeli për sulmet e tij vdekjeprurëse në Gaza, ka thënë një zëdhënës i Shtëpisë së Bardhë për emisionin “Hannity” të Fox News.

“Administrata e Trump dhe Shtëpia e Bardhë u konsultuan nga izraelitët për sulmet e tyre në Gaza sonte”, citohet të ketë thënë sekretarja e shtypit e Shtëpisë së Bardhë, Karoline Leavitt në një intervistë për Fox News.

Mjekët palestinezë në Gaza raportuan se dhjetëra njerëz u vranë si pasojë e një sërë sulmesh ajrore më të dhunshme nga Izraeli në enklavën palestineze që kur u arrit një armëpushim më 19 janar midis Izraelit dhe militantëve të Hamasit.

Dhe një zyrtar i lartë i Hamasit tha se Izraeli kishte përmbysur në mënyrë të njëanshme marrëveshjen e armëpushimit.

“Siç e ka bërë të qartë Presidenti Trump – Hamasi, Houthi-t, Irani, të gjithë ata që kërkojnë të terrorizojnë jo vetëm Izraelin, por edhe Shtetet e Bashkuara të Amerikës, do të kenë një çmim për të paguar”, ka thënë zëdhënësja e Shtëpisë së Bardhë.

Trump kishte lëshuar më parë publikisht një paralajmërim duke përdorur fjalë të ngjashme, duke thënë se Hamasi duhet të lirojë të gjithë pengjet në Gaza ose “le të shpërthejë ferri”.

Lufta e Izraelit në Gaza ka vrarë mbi 48,000 palestinezë, sipas ministrisë lokale të shëndetësisë, duke shkaktuar gjithashtu akuza për gjenocid dhe krime lufte që Izraeli i mohon.

Sulmi i Izraelit ka zhvendosur brenda vendit pothuajse të gjithë popullsinë 2.3 milionëshe të Gazës dhe ka shkaktuar një krizë urie.

Autoritetet izraelite thonë se e nisën luftën si hakmarrje për sulmet e Hamasit të 7 tetorit 2023. /Telegrafi/