Pse të “bësh” gjithmonë diçka nuk është zgjidhje

Gjetja e ekuilibrit kërkon të lini hapësira mes detyrave

Është e premte dhe ndodheni në zyrën e terapistit tuaj të ri. Kanë kaluar dy javë që kur mbyllët një lidhje 10-vjeçare, por kur ai ju pyet se si jeni, përgjigjja juaj është: “Shumë mirë.” Dhe si të mos ishit? Keni porositur tre libra për të përballuar dhimbjen. Me pak fjalë, po përballeni në mënyrë perfekte me ndarjen dhe shpresoni që terapisti ta vërejë këtë.

Nëse ky skenar ju tingëllon i njohur, atëherë “bërja” mund të jetë mekanizmi juaj kryesor i përballimit. Kur gjërat bëhen të vështira, ju i hidhni sytë te lista e detyrave dhe nisni veprimin. Në thelb, kjo mund t’ju ndihmojë të ndiheni në kontroll, por në të njëjtën kohë, mund t’ju çojë drejt lodhjes dhe vështirësive për t’u çlodhur.

Ja çfarë duhet të dini për këtë prirje dhe si mund të gjeni një balancë më të shëndetshme.

Pse “bëjmë” për të përballuar situatat?

Përgjigjja është e thjeshtë: sepse na bën të ndihemi më mirë. Veprimi i pandalshëm na krijon ndjesinë e kontrollit dhe efikasitetit, dhe ndonjëherë na ndihmon të shmangim ndjenjat e vështira. Ky mekanizëm mund të jetë një reagim i mësuar, por rrënjët e tij janë edhe biologjike. Në situata të vështira, trupi ynë aktivizon mekanizmat e mbijetesës “lufto” ose “ik,” që fillimisht kanë shërbyer për të na mbrojtur nga rreziku.

Por kur përdoret në mënyrë të tepruar, kjo sjellje e vazhdueshme mund të na lodhë fizikisht dhe emocionalisht.

Pasojat e kësaj prirjeje

Të qenit një person që vepron nuk është diçka e keqe, derisa ta përdorni në ekuilibër. Kur e teproni, trupi juaj del nga gjendja e tij natyrale e balancës. Kjo mund të shkaktojë lodhje dhe ta bëjë më të lehtë për ju që të kërkoni “shpëtim” në mënyra të pashëndetshme, si përdorimi i tepruar i rrjeteve sociale, ushqimi i shpejtë ose konsumi i alkoolit.

Në plan afatgjatë, këto strategji nuk ndihmojnë për t’u rikuperuar, dhe emocionet e papërpunuara mund të shfaqen në momente të papërshtatshme.

Si ta balanconi këtë prirje?

Nëse jeni një person që “bën” për të përballuar situatat, është e rëndësishme të mësoni të ndaloni.

Kjo mund të duket e frikshme, sepse qetësia mund të ndihet e pakëndshme dhe ju bën të mendoni se jeni të pambrojtur. Por, me disa hapa të vegjël, mund të arrini të krijoni një ekuilibër më të shëndetshëm.

1. Lini hapësirë për mendimet tuaja

Kur jeni të zënë, nuk i lini kohë mendjes suaj të përpunojë emocionet. Provoni aktivitete të lehta që ju lejojnë të “lundroni” me mendimet tuaja, si rregullimi i një dollapi ose lyerja e thonjve.

Pjesën më të madhe të këtij aktiviteti bëjeni pa dëgjuar muzikë, televizor ose “podcast.” Shënoni ato mendime ose ndjenja që shfaqen dhe mos u mundoni t’i zgjidhni menjëherë.

2. Punoni drejtpërdrejt me emocionet tuaja

Shpeshherë emocionet si zemërimi ose mërzia mund të ndihen qartë, por ndonjëherë shfaqen përmes lodhjes ose tensionit në trup. Përballuni me këto ndjesi duke bërë pyetje si: “Çfarë më shqetëson?” ose duke përdorur lëvizjen, si një seancë boksi, për të larguar energjinë negative.

3. Mësoni të thoni “jo”

Gjetja e ekuilibrit kërkon të lini hapësira mes detyrave. Filloni duke zvogëluar ngarkesën tuaj me 10% dhe zgjidhni detyrat më të lehta për t’i refuzuar. Për shembull, mund të thoni “Jo” për një projekt të vogël dhe ta filloni kështu praktikën e vendosjes së kufijve.

Duke mësuar të kujdeseni për veten gjatë gjithë këtij procesi, jo vetëm që do të ndiheni më mirë, por do të bëni më shumë me më pak përpjekje. /Telegrafi/