Në Austri pritet të ketë një koalicion trepartiak – por pa partinë fituese të ekstremit të djathtë

Një vendim paraprak u mor të hënën për një koalicion qeverisës në Austri të hënën – një që do të përjashtojë Partinë e Lirisë së ekstremit të djathtë (FPÖ).

Sipas mediave të huaja, përcjell Telegrafi, megjithëse FPÖ fitoi zgjedhjet kombëtare në shtator me rreth 29% të votave, presidenti federal Alexander Van der Bellen i dha “fituesit të dytë”, kancelarit federal Karl Nehammer të Partisë Popullore të qendrës së djathtë (ÖVP), mandatin për të formuar një qeveri.

Dhe kjo erdhi pasi asnjë parti nuk ishte e gatshme të punonte së bashku me FPÖ dhe kreun e saj të partisë Herbert Kickl.

Pas disa raundesh bisedimesh, Nehammer njoftoi një koalicion të propozuar me Social Demokratët (SPÖ) dhe Liberalët (NEOS). Kjo do të ishte hera e parë që Austria formon një koalicion tre-partiak.

“Në të njëjtën kohë, do të doja të bëja të qartë se ne nuk kemi arritur ende qëllimin e një koalicioni apo një programi të përbashkët qeveritar”, ka thënë Nehammer, duke shtuar se “ne tani po hyjmë në negociata të thella qeveritare që prekin shumë fusha të detajuara. Rezultati i këtyre negociatave është ende i hapur”.

Ndërsa e djathta ekstreme po merr rezultatet të mira në të gjithë Evropën, disa vende kanë bërë lëvizje për t’i bllokuar ato drejt pushtetit. /Telegrafi/