Gashi për Asociacionin: Po të ishte i mirë, Thaçi e Mustafa s’do t’ia linin ‘dhuratë’ Kurtit

Avokati Tomë Gashi ka komentuar se Asociacioni është një barrë për Kurtin nga e kaluara. Ai mendon se nëse Asociacioni do të ishte i mirë, pushtetarët e mëparshëm do ta kishin themeluar atë dhe nuk do ta kishin lënë si “dhuratë” për Kurtin.

Hapa konkretë për Asociacionin në lidhje me Këshill të Evropës, kishin kërkuar Franca, Gjermania e Italia. Diçka konkrete ishte dërgimi në Gjykatë Kushtetuese draft-statuti i Asociacionit të përpiluar nga evropianët, por kjo u quajt absurde nga kryeministri Albin Kurti dhe e refuzoi.

E duket se hapa konkretë ka marrë ministrja e Punëve të Jashtme dhe Diasporës, Donika Gërvalla, e cila i ka adresuar një letër presidentit të Asamblesë Parlamentare të Këshillit të Evropës, Theodoros Rousopoulos, ku thuhet se Qeveria e Kosovës është duke përgatitur një draft-statut për Asociacionin.

Lexo po ashtu Gjermania, Franca dhe Italia këmbëngulin: Pa Asociacion, nuk ka pranim të Kosovës në Këshillin e Evropës

Në atë letër është zotuar ta dërgojë në Gjykatën Kushtetuese deri në fund të majit, duke theksuar se Qeveria e Kosovës ka shprehur vullnetin dhe se shpreson se zotimi i saj të përmbushet.

Këtë ka komentuar edhe avokati Tomë Gashi, i cili Asociacionin e sheh e si barrë për Kurtin nga e kaluara.

Sipas tij, nëse Asociacioni do të ishte i mirë, do ta themelonin pushtetarët e mëhershëm dhe s’do t’ia linin “dhuratë” Kurtit.

“Ata të vitit 2013 dhe 2015, më pas qenë diçka e mirë kishin iplementu më herët. Nëse është diçka e mirë, tjerët që kanë qenë në pushtet para, Hashim Thaçi, Isa Mustafa e tjerët nuk ia kishin lënë diçka të mirë Kurtit. Edhe e kishin bërë vetë, sepse ashtu do ta proklamonin vetën si liderë të fuqishëm të Kosovës, por e dini që kanë sjellë situata të tilla dhe kanë nënshkruar çkado që ka sjellë Serbia. Nëse kish me qenë diçka e mirë, e kishin implementu ata vetë, e nuk ia kishin lënë këtë dhuratë Kurtit, ka thënë Gashi në “FIVE” të Dukagjinit.