Mashtronin shtetas të huaj përmes Call Center, arrestohen gjashtë persona në Tiranë

Policia e Tiranës ka goditur një Call Center që merrej me mashtrimin e shtetasve të huaj, që të investonin para në tregje fiktive.

Si pasojë e operacionit të i koduar “Selita Center” u arrestuan në flagrancë 6 shtetas të punësuar në këtë subjekt, mes tyre përgjegjësi i firmës dhe shefja e personelit.

Euronews Albania mëson se shtetasit e arrestuar janë: Ermion Markaj, 35-vjeç me detyrë përgjegjës i firmës, Patricja Radovani, 29 vjeçe, me detyrë shefe e personelit të firmës, si dhe shtetasit Donald Toma, Areteo Butsi, Emanuele Jaho dhe Fiodor Ziu.

Gjithashtu u shpall në kërkim administratori i subjektit, shtetasi Julian Marka, 31-vjeç.

Nga verifikimet ka rezultuar se shtetasit që u gjetën në këtë subjekt ishin punësuar në mënyrë të paligjshme dhe mashtronin shtetas të huaj, kryesisht italianë dhe grekë, që të investonin para në tregje fiktive.

Gjatë kontrollit në ambientet e këtij subjekti janë gjetur 101 kompjuterë, 2 laptopë, 1 DVR dhe 10 celularë, të cilët janë sekuestruar në cilësinë e provës materiale.

Materialet në ngarkim të tyre i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Mashtrimi kompjuterik”, “Punësimi i paligjshëm”, “Fshehja e të ardhurave”, “Mospagimi i taksave dhe tatimeve” dhe “Pastrimi i produkteve të veprës penale ose veprimtarisë kriminale”.