Si u vra ish-luftëtari i UÇK-së, Shaqir Krasniqi?

Në mbrëmjen e 6 prillit të vitit 2004 ishte vrarë Shaqir Krasniqi, ish-luftëtar i Ushtrisë Çlirimtare të Kosovës, i cili ishte kapiten në Trupat Mbrojtëse të Kosovës.

Dosja e lëndës tregon se Shaqir Krasniqi i kishte paralajmëruar institucionet se diçka e keqe pritej t’i ndodhte.

Ai kishte dhënë deklaratë në TMK e në UNMIK për planet se dikush po planifikonte ta vriste.

Dosja e vrasjes së tij tregon se ai u qëllua me Kallashnikov derisa po udhëtonte me nënën e tij.

Nëna e Shaqirit, Lushe Krasniqi, ka rrëfyer gjithë ngjarjen, e cila kishte tronditur rajonin e Dukagjinit atë kohë.

Ajo ka thënë se ka qenë me Shaqirin kur i kanë telefonuar dhe e kanë kërcënuar se do ta vrasin.

“Fill mbas lufte ai nuk e dinte, rrinte shlirë, thoshte s’kam tutë prej kurrkujt. ia filloi punës në TMK si kapiten. Dy javë pasi diplomoi, kemi bo banket e kreu akademinë tre muaj ditë, dy javë pasi diplomoi e vranë. M’kallxonte që ka kërcënime në telefon. E thirrshin dhe në telefon ia lëshojshin automatin”, ka thënë Lushe Krasniqi në emisionin “Kallxo Përnime”.

Lushe Krasniqi ka thënë se deklaratat e djalit të saj që i kishte dhënë para se të vritej i ka dërguar në prokurori dhe Polici.

“Shaqiri u vra mbi urë të Bistricës. Unë jam kanë me të, jena dalë para orës 8:00 me shku te një ilake, kem nejtë. Në 8:00 kemi dalë me u kthy në shtëpi, mbi urë të Bistricës na kanë gju. Shaqirin e kanë vra, mua më kanë plagosur”, ka treguar ajo.

Por, sipas saj asnjëherë nuk janë marrë parasysh, as për temën e Shaqirit nuk e kanë lënë askënd që të ndërmarrë diçka.

“Prokurorët dhe gjykatësit janë të korruptuar. Deklaratat e tij i kam bërë fotokopje, dëshmi janë të cilat i kam përkthyer edhe tek avokati, i kam çu gjithkah por këto janë humbë, pos këtyre që i ruaj unë”, ka thënë ajo.

Letrat që po i përmend nëna e Shaqir Krasniqit të vrarë, janë deklaratat e djalit të saj që ai i kishte dhënë para së të vritej.

Në njërën nga këto deklarata ai përmend me emër e mbiemër personin që siç pretendon ai i kishte organizuar prita për ta vrarë.

“Sipas një djaloshi kam mësuar se nga dy persona kam pasur afër 23 prita që m’i kanë organizuar. Unë kam rënë vetëm në katër prita të tyre. Të gjitha këto i kam mësuar mëngjesin e datës 15.12.2000” – kishte deklaruar në UNMIK ndër tjera Shaqir Krasniqi.

Ai kishte vizituar familjen e personit të dyshimtë.

Aty përshkruhet se kishte takuar të atin e tij, të cilit i kishte kërkuar sqarime.

“Kam shkuar në shtëpinë e tij dhe i kam thënë babës së tij se çka ka përgatitur djali i tij të më vrasë mua dhe në prezencën e familjarëve të tij i kam kërkuar arsyen pse ai do të më vrasë mua. Ai në prezencën e tyre ma ka pranuar se ka tentuar të më vrasë, por nuk më ka dhënë ndonjë detaj lidhur me këtë” – kishte deklaruar më tej Shaqir Krasniqi në UNMIK.

Në atë kohë përgjegjësia për sigurinë në vend ishte tek autoritetet e policisë së UNMIK-ut por kishte edhe policë vendorë.

Shaqir Krasniqi ishte bërë pjesë e UÇK-së si 22-vjeçar. Ai ishte plagosur në Prilep të Deçanit ndërsa për shërimin e tij ishte dërguar në Gjermani, për t’u kthyer serish në luftën e Koshares.

Shaqir Krasniqi la pas vete një vajzë.

Vrasja vazhdon të mbetet mister për familjen dhe autoritetet, të cilat ende vazhdojnë ta mbajnë në listën e vrasjeve të pazgjidhura këtë ngjarje. /Kallxo.com/