Ndalimi i procesit të grupit kërkimor në Twitter ndërlikon pajtueshmërinë me ligjin e ri të BE-së

Ndalimi i një programi në Twitter që ishte kritik për studiuesit e jashtëm që studionin fushatat e dezinformimit vë në pikëpyetje strategjinë e kompanisë për të respektuar rregulloren e ardhshme në Evropë, thanë ish-punonjësit dhe ekspertët për Reuters.

Akti i ri i Shërbimeve Digjitale të Bashkimit Evropian (DSA), një nga rregulloret më të rrepta në botë për platformat e internetit, i ka dërguar kompanitë e teknologjisë që të përpiqen të përmbushin kërkesat e saj për marrjen e masave kundër përmbajtjes së paligjshme dhe shpjegimin e hapave që ndërmarrin për moderimin e përmbajtjes, përpara se ligji të hyj në fuqi të plotë në fillim të vitit 2024.

Twitter nënshkroi një marrëveshje vullnetare në qershor me BE-në në lidhje me DSA duke u angazhuar për “fuqizimin e komunitetit të kërkimit” përmes mjeteve që përfshijnë ndarjen e grupeve të të dhënave për dezinformimin me studiuesit. Qëllimi i BE-së me ligjin është të krijojë një internet më të sigurt për përdoruesit dhe të ketë një mekanizëm për t’i mbajtur kompanitë përgjegjëse, transmeton Telegrafi.

Sipas Yoel Roth, ish-kreu i besimit dhe sigurisë së Twitter-it, Konsorciumi i Kërkimit të Moderimit të Twitter ishte një pjesë kyçe e planit të Twitter për ta bërë këtë, pasi ai përpiloi të dhëna për manipulimin e platformës të mbështetur nga shteti dhe ua dha këtë studiuesve. “Twitter ishte pozicionuar në mënyrë unike dhe të mirë,” tha ai.

Pothuajse të gjithë 10 deri në 15 punonjësit që punuan në konsorcium janë larguar nga kompania që nga marrja e Elon Musk në tetor, sipas Roth, i cili dha dorëheqjen në nëntor, e bashkë me të edhe tre ish-punonjës të tjerë që ishin të përfshirë në program.

Ligji i BE-së do të kërkonte që platformat me mbi 45 milionë përdorues të BE-së t’i përgjigjen propozimeve të studiuesve të verifikuar nga BE. Mosrespektimi i DSA-së sapo të hyjë në fuqi mund të çojë në gjoba deri në 6 për qind të të ardhurave globale ose edhe ndalim të operimit në BE, sipas faqes së internetit të Komisionit Evropian.

Nga Reuters thonë se ata nuk ishin në gjendje të përcaktonin se nëse Twitter ka bërë plane alternative për t’u pajtuar me DSA.

Në një email, shefja e besimit dhe sigurisë së Twitter-it, Ella Irwin, deklaroi: “Ne synojmë të respektojmë plotësisht DSA-në, kemi shumë punonjës që punojnë për pajtueshmërinë me DSA brenda vendit dhe kemi komunikuar qëllimin tonë për t’u pajtuar me komisionerin e BE-së Thierry dhe ekipin e tij”. /Telegrafi/