Mero Baze jep versionin e tij për rrëmbimin dhe vrasjen e Remzi Hoxhës

Gazetari Mero Baze ka dhënë versionin e tij për zhdukjen e Remzi Hoxhës.

Baze në “Debat Plus” në RTV Dukagjini thotë se përgjegjësia për zhdukjen e Remzi Hoxhës i takon Shërbimit Informativ të shtetit shqiptar të asaj kohë (SHIK).

Ai thotë se Remzi Hoxha kishte biznese dhe sipas tij edhe rrëmbimi lidhet me këtë gjë.

“Më erdhën në zyre vëllai i Remziut me një shok timin dhe më thonë se atë e kanë rrëmbyer me një makinë. Më thanë që e kanë marrë në Komisariatin nr.3. I mora në telefon në komisariat dhe iu them se e keni marrë një kosovarë, lirojeni se është miku im. Më thanë se i kanë marrë të Shërbimit dhe zakonisht i lirojnë pas 24 orëve…Të nesërmen erdhi vëllai dhe gruaja dhe më thanë se nuk e kanë liruar. Pasi e thirra komisariatin më thanë se e kanë ngatërruar personin dhe se ai nuk ishte por një person tjetër. Pata një lloj shqetësimi dhe ju premtova që do të merrem më shumë personalisht me rastin”.

“Mora kryeministrin Aleksandër Meksin dhe ai më tha që është përgjegjësi e SHIK-ut. Mora Ministrinë e Brendshme dhe më thanë edhe atë që është punë e SHIK-ut. Me shefin e SHIK-ut, Bashkim Gazidede nuk kisha raporte të mira. Më lehtë depërtoja te Berisha që ishte president se te Gazidede. Shkova në mbrëmje te Sali Berisha dhe ja shpreha shqetësimin. Ai menjëherë ma ndryshoi bisedën. “Po t’i ku e njeh këtë” më pyeti Berisha si me habi. Ia tregova se ka qenë shoku im ortak me Remziun. Më tha: ”Shoku juaj të bëjë kujdes për veten. Mos u merr me këto gjëra”. I thashë e njoh prandaj u interesova”.

“Berisha më tha se do të flasë më ata të shërbimit dhe kështu kishte ndodhur. Gazidede me thirri në telefon dhe fjalët e njëjta si Berisha që të mos merrem me rastin”.

Baze thotë se për çështjen u interesua edhe gazetari tjetër Ylli Rakipi, por se sipas tij edhe atij i kishin thënë gjëra të tmerrshme.

“”Mos e kanë marrë këta të Maqedonisë se ka bërë atentat ndaj Gligorovit”, e gjëra të tjera, që me sa duket u kishte ngelur në dorë (Remziu) pasi ishte dita e tretë apo katërt pas rrëmbimit”, rrëfen tutje Baze.

Gazetari thotë se edhe Rugova dhe Bukoshi zyrtarisht janë interesuar për fatin e Remzi Hoxhës, por asnjëherë Shqipëria në atë kohë nuk kishin dhënë detaje për fatin e tij.

Ai thotë se qëllimi final nuk ka qenë vrasja e Remzi Hoxhës por vetëm nxjerra e informacioneve nga ai, por sipas tij “Remziu u ka ngelur në dorë shërbimeve të Shqipërisë”.

Baze thotë se krimi më i madh i shtetit shqiptar është fshehja e vrasjes së Remzi Hoxhës.

Ai thotë se drejtësia shqiptare ka arritur deri të tre vrasësit e Remzi Hoxhës por jo edhe te trupi i tij./Telegrafi/