Kompanitë australiane të minierave nënshkruajnë marrëveshje me gjigantët e automobilave

Industria ndërkombëtare e automobilizmit po vazhdon të besojë në kompanitë australiane të minierave të metalit, me dy marrëveshje të tjera të shpallura këtë muaj.

Gjatë së mërkurës, u shpall një bashkëpunim strategjik afatgjatë në mes të gjigantit amerikan të automobilave General Motors dhe Queensland Pacific Metals – një kompani e dedikuar për prodhimin e qëndrueshëm të sulfat nikelit dhe sulfat kobaltit për përdorim në bateritë e litium-jonit.

“Bashkëpunimi me Queensland Pacific Metals do t’i sigurojë General Motors-it një furnizim të sigurt dhe afatgjatë me kosto konkurruese të nikelit dhe kobaltit nga një partner i marrëveshjes për tregti të lirë për të ndihmuar në mbështetjen e nevojave tona në rritje për prodhimin e veturave elektrike”, deklaroi Jeff Morrison, Zëvendës President i General Motors në Blerjet Globale dhe Zinxhirin e Furnizimit, raporton Drive, përcjell Telegrafi.

“Çka është më e rëndësishmja, kjo marrëveshje demonstron dedikimin tonë në ndërtimin e lidhjeve më të forta me furnizuesit dhe është në përputhshmëri me qasjen tonë ndaj burimeve të përgjegjshme dhe menaxhimit të zinxhirit të furnizimit”, tha tutje ai.

Në të njëjtën ditë, kompania e minierave të nikelit dhe kobaltit GME Resources me bazë në perëndim të Australisë njoftoi se ata kishin nënshkruar një memorandum mirëkuptimi jodetyrues me Stellantis – kompania mëmë e sapoformuar të 16 markave të veturave, duke përfshirë këtu edhe Alfa Romeo, Citroen, Fiat, Jeep, Peugeot dhe Ram.

“Stellantis po punon çdo ditë për t’u siguruar klientëve tanë lirinë e lëvizshmërisë së pastër, të sigurt dhe të përballueshme”, tha Maxime Picat, Shefi i Blerjeve dhe Zyrtar i Zinxhirit Furnizues të Stellantis.

“Sigurimi i burimeve të lëndës së parë dhe furnizimi me bateri do ta forcojë zinxhirin e vlerës të Stellantis për prodhimin e baterive të veturave elektrike, dhe po me aq rëndësi do ta ndihmojë kompaninë që ta arrijë synimin e saj kryesor të dekarbonizimit”, vazhdoi tutje Picat. /Telegrafi/