Konjufca në Austri falënderon homologun Sobotka për përkrahjen ndaj shtetit të Kosovës  

Kryetari i Kuvendit të Kosovës, Glauk Konjufca ndodhet për vizitë në Austri, ndërsa në takimin me homologun Wolfgang Sobotka ka falënderuar shtetin austriak për ndihmën ndaj shtetit të Kosovës në të gjitha proceset.

Konjufca në një postim në Facebook shkruan se do të forcohen edhe më tej marrëdhëniet Kosovë-Austri.

“Sot, në vizitën time zyrtare në shtetin e Austrisë, pata kënaqësinë që të takohem me kryetarin e Parlamentit, Këshillit Kombëtar të Austrisë, mikun tim z.Wolfgang Sobotka.

Jam thellësisht falënderues për rolin, mbështetjen dhe kontributin që Austria ka dhënë për pavarësinë e Republikës së Kosovës dhe konsolidimin e shtetit tonë që një kohë të gjatë.

Shpreh mirënjohjen edhe për mbështetjen që aktualisht Austria po i jep procesit të integrimit të Kosovës dhe rajonit të Ballkanit në Bashkimin Evropian”, shkruan kreu i Kuvendit të Kosovës.

Konjufca shkruan se nevojitet forcimi i bashkëpunimit ndërparlamentar dhe ndërshtetëror në fusha të ndryshme me interes dypalësh, e në veçanti për promovimin e biznesit dhe nxitjen e investimeve direkte nga kompanitë austriake në Kosovë.

“Në këtë mënyrë, do të forcohen edhe më shumë lidhjet historike, miqësore e kulturore midis vendeve dhe popujve tanë”, shkruan ai. /Telegrafi/