Erdogan thotë se ende nuk kanë pranuar ‘propozime konkrete’ ndaj shqetësimeve të Turqisë nga Suedia dhe Finlanda

Turqia nuk ka marrë ‘propozime konkrete’ për të adresuar shqetësimet në lidhje me ofertën e Suedisë dhe Finlandës në NATO.

Kështu ka thënë gjatë fjalimit të tij në parlament, presidenti turk Recep Tayyip Erdogan, i cili ka shtuar se Turqia dëshiron të shoh një qasje më të sinqertë nga dy vendet nordike në lidhje me shqetësimet e vendit të tij ndaj kërkesës së tyre për anëtarësim në NATO.

Ai tha se kundërshtimi i Turqisë ndaj Stokholmit dhe Helsinkit zyrtar në lidhje me kërkesën e tyre për anëtarësim nuk është “oportunizëm” siç thuhet nga disa, por më shumë si shqetësim në lidhje me sigurinë kombëtare, transmeton Telegrafi.

Muajin e kaluar Finlanda dhe Suedia zyrtarisht dorëzuan kërkesat e tyre për anëtarësim në NATO në një “moment historik” siç u quajt ndryshe pas shqetësimeve mbi stabilitetin e sigurisë së tyre pas agresionit rus ndaj Ukrainës.

Kërkesa e tyre tani do të shqyrtohet nga 30 vendet anëtare të aleancës ushtarake.

Megjithatë presidenti turk Recep Tayyip Erdogan ka shprehur rezerva për bashkimin e këtyre dy vendeve në aleancë.

Qeveria turke po shtyn kërkesat e tyre ndaj Suedisë dhe Finlandës që të godasin disa subjekte që sipas Ankarasë zyrtare janë të lidhura me Partinë Punëtore Kurde, parti e cila në Turqi konsiderohet si organizatë terroriste. /Telegrafi/