BSPK pas miratimit të vlerë së re të pagës minimale: Qëndrojmë fuqishëm pas kërkesave sindikale

Bashkimit të Sindikatave të Pavarura të Kosovës (BSPK) njofton se qëndrojnë fuqishëm pas kërkesave sindikale dhe se do të ndjekin të gjitha rrugët ligjore për intensifikimin e veprimeve te duhura në të mirë të ngritjes së mirëqenies ekonomike, sociale dhe shëndetësore të të punësuarve.

Me anë të një reagimi publik, kryetari i BSPK-së, Atdhe Hykolli ka theksuar se do të vazhdojë me artikulimin e kërkesave në të gjitha format e lejuara me ligj.

“Duhet të dihet se vlera e pagës minimale është vlerë që llogaritet dhe nuk është punë dëshirash, e në Këshillin Ekonomiko-Social (KES) vepron Komisioni Profesional Trepalësh për Paga, Çmime dhe Pensione, i cili e ka për detyrë të shqyrtojë dhe të ofrojë rekomandime për çështje të cilat janë kompetencë e tyre në takimet e KES-it dhe të organeve të tjera qeveritare, me qëllim të orientimit dhe të zbatimit të politikave shtetërore në fushat të cilat i mbulon”, thuhet në reagimin e Hykollit.

Ai thekson se votimi i pagës minimale prej 264 euro nga Qeveria e Kosovës nuk kishte marr miratimin e KES-it.

“Sindikatat e kanë mandatin që ia jep Ligji, të përfaqësojnë interesat e sindikalistëve. Në Takimin e fundit të KES-it, më 10 mars, në votim u hodhën dy propozime për vlerën e Pagës minimale – 264 euro dhe 300 euro dhe asnjëri nga këto propozime nuk mori vota e duhura – 2/3 e votave. Dhe sot kemi një pagë minimale e cila është hedh në votim në mbledhjen e fundit të KES-it por nuk ka marrë votat e duhura”, shtoi ai.

Lexo po ashtu Qeveria miraton pagën minimale, 250 euro neto

Mes tjerash, Hykolli deklaroi se, “KES-i do të vazhdojë me punën rreth përcaktimit të pagës minimale edhe për vitin 2023, që do të mundësojë propozimin e pagës minimale më të lartë se në vitin që jemi, vitin 2022”. /Telegrafi/