Pamje shokuese nga përmbytja e pronës së George Clooneyt në vlerë prej 12 milionë eurosh

Thuajse e gjithë prona e George Clooneyt dhe bashkëshortes së tij, Amal, që ndodhet në Berkshire është përmbytur nga lumi Thames gjatë stuhisë Dennis që e ka përfshirë Mbretërinë e Bashkuar.

Fotografitë e pronës (në vlerë prej 12 milionë eurosh) nga shekulli i 17-të, para dhe pas përmbytjes, janë shokuese. Në to shihet se fusha e tenisit, tarraca dhe pjesa më e madhe e pronës është nën ujë, ndërsa kjo nuk është hera e parë që prona e yllit hollivudian përmbytet nga uji, transmeton The Sun.

Për t’i bërë gjërat më keq, në Angli janë paralajmëruar reshje të mëdha shiu që mund të shkaktojnë përmbytje akoma më intensive.

Çifti i famshëm ishte vendosur në këtë pronë në vitin 2016, pasi e kishin rinovuar në tërësi, duke qenë se paraprakisht ishte përmbytur nga uji. Njëherësh, është paralajmëruar edhe stuhia e pestë e këtij sezoni që do të marrë emrin Ellen.

Stuhitë Dennis dhe Ciara janë shoqëruar me reshje të mëdha, ndërsa Britania e Madhe është përballur me përmbytjet më të mëdha në 200 vitet e fundit. /Telegrafi/