500 mijë protestues kundër tij: Kush është “socialisti që i vuri flakën Rumanisë”? (Video)

“Faji është i Brukselit”. “Prapa korrupsionit fshihet spekullanti miliarder Xhorxh Soros”. “Në kulisa po luajnë lobet europiane”.

Teoritë konspirative nuk mungojnë as nga kreu i së majtës rumune, Liviu Dragnea, i cili është vënë në shënjestrën e protestave masive, “më të mëdhatë që kanë prekur vendin që pas rënies së regjimit diktatorial të Çausheskut”, shkruan Le Monde në një shkrim, përcjell Lapsi.al.

Dragnea, aktualisht kryetar i parlamentit rumun, po ecën në gjurmët e liderëve popullistë në Hungari, Poloni, Maqedoni dhe Shqipëri, të cilët në vend që të shohin problemet e tyre, i shpjegojnë ngjarjet me teori paranojake.

Kur partia e tij fitoi zgjedhjet e përgjithshme të një viti më parë, megjithëse ishte lideri i padiskutueshëm i social demokratëve rumunë, Liviu Dragnea, nuk morri dot vendit e kryeministrit.

Një ligj që i ndalonte politikanëve të dënuar penalisht hyrjen në qeveri, u bë pengesë për ëndrrën e tij.

Dhe kështu politikani që qe dënuar për manipulimin e zgjedhjeve në qytetin Aleksandria me 45 mijë banorë, u detyrua të bëjë shef të qeverisë besnikun e tij Sorin Grindeanu, shkruan Le Monde.

Mirëpo edhe pasi zgjodhi për vete vendin e shefit të parlamentit, Liviu Dragneas nuk iu ndanë telashet.

Një tjetër hetim nisi për të në 31 dhjetor, me akuzën e punësimit fiktiv. Ai kishte paguar dy sekretare të partisë së tij me fonde publike, duke i punësuar ato fiktivisht në administratën lokale. Dëmi për të cilin ai akuzohej ishte 24 mijë euro.

Por po të njëjtën ditë (31 janar) kur prokuroria nisi çështjen kundër Dragneas, miku i tij kryeministër nxori një dekret që “amnistonte” të gjithë politikanët që kishin problem me drejtësinë dhe akuzoheshin për abuzime deri në 44 mijë euro.

Kjo ishte shkëndija që i vuri benzinë zjarrit dhe zbriti në sheshe 500 mijë rumunë, të cilët protestojnë prej një jave kundër korrupsionit dhe pandëshkueshmirisë së politikanëve.

Megjithëse qeveria e Sorin Grindeanu e tërhoqi dekretin protestat tashmë të ndezura nuk pushuan.

Protestuesit i akuzojnë njerëzit me pushtet si Liviu Dragnea, për vilat e tyre përrallore me pishina, për abuzimet me fondet shtetërore dhe për korrupsionin galopant.

Përballë tyre, shefi i PSD-së rumune ka zgjedhur të bërtasë për teori komploti dhe skenarë nga jashtë.

Dragnera zuri në krye të partisë së tij vendin e ish kryeministrit Victor Ponta (2012-2015) i cili pas tre vitesh pushtet u akuzua gjithashtu për korrupsion. /Telegrafi/