26 mjekë e infermierë nga Spitali i Pejës presin sot rezultatin pas testimit për COVID-19

Drejtoresha e Infermierisë në Spitalin e Pejës, Hidajete Krasniqi ka folur për situatën e përgjithshme në Spitalin e Pejës sa i përket coronavirusit.

Krasniqi në RTV Dukagjini thotë se janë 26 mostra të personelit shëndetësorë nga Spitali i Pejës që pritet të marrin rezultatet gjatë ditës së sotme.

Ajo ka thënë se mostrat janë marrë gjatë ditës së djeshme por për arsye të ndryshme Instituti i Shëndetit Publik nuk ka mundur t’i publikojë rezultatet për ato.

“Numri më i madh i mostrave janë marrë nga Reparti i Gjinekologjisë dhe Neonatologjisë”, tha Krasniqi përcjell Telegrafi.

Drejtoresha e Infermierisë në Spitalin e Pejës ka thënë se një doktoreshë nga Reparti i Neonatologjisë tashmë është pozitive me COVID-19 por sipas saj për fat të mirë kontaktet e saj që janë testuar deri më tani kanë dalë negative.

Krasniqi thotë se ende është mister nga është infektuar mjekja pasi sipas saj nuk ka mundur të infektohet në spital.

“Ekipet e Institutit të Shëndetit Publik janë duke hulumtuar te gjitha lindjet që ka marrë pjesë doktoresha por në spital nuk ka mundur ta merr. Për fat të mirë doktoresha është mirë me shëndet dhe jemi në komunikim të përditshëm”.

Drejtoresha e Infermierisë në Spitalin e Pejës thotë se nëse QKUK nuk i përballon numrin e të prekurve me COVID-19 edhe Spitali i Pejës është i gatshëm të pres pacientë të tillë dhe se sipas saj tashmë janë bëtë të gjitha përgatitjet./Telegrafi/