Zyrtarë të lartë të pushtetit qendror dhe të atij komunal kanë nderuar Ekrem Rexhën – Komandant Drinin në 25-vjetorin e vrasjes së tij.
Kryeministri në detyrë, Albin Kurti ka njoftuar se në shoqëri të bashkëpunëtorëve në Prizren kanë nderuar figurën e Ekrem Rexhës, Komandant Drinit, në 25 vjetorin e vrasjes së tij.
“Bëmë homazhe në varrin e tij në Landovicë, te memoriali në lagjen Bazhdarhane si dhe vizituam familjen e Komandant Drinit”, ka bërë të ditur ai në rrjetet sociale.
Tutje ka theksuar se “Komandant Drini ishte veprimtar intelektual e luftëtar i paepur, i cili me pushkë lirie në dorë dhe me strategji ushtarake në mendje u përball me armikun e okupatorin serb”.
“E vranë pabesisht para shtëpisë së tij në lagjen Bazhdarhane në Prizren, në mëngjesin e 8 majit të vitit 2000. Drejtësia vazhdon të mungojë edhe 25 vjet më vonë. Ajo është vonuar aq shumë saqë është mohuar, e vrasësit e tij mbeten të lirë”, është shprehur ai, raporton Telegrafi.
Me këtë rast i ka bërë thirrje organeve të drejtësisë që të merren me këtë çështje menjëherë dhe ta zbardhin rastin, “meqenëse të kalosh në gjithë ato sfida të okupimit e të luftës e ta pësosh në mënyrë fatale pas luftës është shumë e pikëllueshme”.
“Populli i Kosovës ndan dhimbjen e madhe me familjen Rexha. Sepse humbja e Komandant Drinit ishte humbje e madhe për familjen Rexha, për Prizrenin, Kosovën e shqiptarinë”.
Ndërkaq Komuna e Prizrenit, ka njoftuar se për nder të 25 vjetorit të ndarjes nga jeta të Ekrem Rexhës - Komandant Drinit, të enjten janë bërë homazhe në varrezat e dëshmorëve, “ku u nderua kontributi i tij dhe i gjithë dëshmorëve të Ushtrisë Çlirimtare të Kosovës për lirinë dhe pavarësinë e vendit”.
“Me këtë rast Kryetari Shaqir Totaj shprehu mirënjohjen dhe respektin për sakrificat e paharruara të heronjve të kombit”, thuhet në njoftimin e Komunës. /Telegrafi/
