11 nxënës të komunitetit ashkali përsëritin vitin në shkollën “Migjeni” në Rufc të Lipjanit

Shkolla Fillore “Migjeni”, në fshatin Rufc të Komunës së Lipjanit ua ka humbur vitin shkollor gjithsejtë 11 nxënësve të komunitetit ashkali që jetojnë në fshatin Hallaq i Vogël. Këta nxënës janë në klasën e gjashtë, shtatë dhe tetë. Humbja e vitit shkollor, sipas prindërve dhe qytetarëve të komunitetit ashkali në këtë fshat, është humbje e motivit për nxënësit për ta vazhduar shkollimin.
Limon Ramadani banor i i fshatit Hallaq i Vogël në Komunën e Lipjanit, ka thënë për Telegrafin se e gjithë banorët janë shqetësuar me veprimin e mësimdhënësve të shkollës.
Ramadani thotë se si ka qenë e mundur që një mësimdhënës brenda një viti shkollor nuk ka arritur të punon me nxënës dhe t’i përgatit për lëndën e tij me qëllim që nxënësit ta marrin të paktën një notë kaluese.
“Këtu ka dështuar e gjithë sistemi arsimor sepse mësimdhënësit është dashur të punojnë më shumë me nxënës për t’ia nxjerrë nga një notë kaluese për lëndët e tyre. Kjo çka ka ndodhur me nxënësit e fshatit tonë është diskriminim sepse fëmijët e komunitetit ashkali janë lënë anash në procesin mësimor, prandaj për këtë do të ankohemi në instancat më të larta të shtetit”, ka akuzuar Ramadani.
Ramadani ka kërkuar nga drejtoria e kësaj shkolle të merren masa urgjente për shqyrtimin e ankesave të prindërve me arsyetime se të gjithë janë tronditur nga veprimet e shkollës.
“Si është e mundur që 11 fëmijë të Komunitetit ashkali ta përsëritin klasën e njëjtë, prandaj ne apelojmë që ky veprim diskriminues mos të përsëritet dhe të shqyrtohen ankesat tona. Ne presim që fëmijët të trajtohen të Barabartë dhe me dinjitet, ndryshe jemi të detyruar që fëmijët tanë ta braktisin mësimin”, ka thënë Ramadani.
Ai ka shtuar se përveç ankesave në instancat më të larta të shtetit, banorët do të organizojnë edhe protesta gjatë ditëve në vazhdim.
Telegrafi ka ndërkohë ka kontaktuar edhe me drejtorin e shkollës “Migjeni” në fshatin Rufc të Lipjanit, Metush Jashanica. Ai ka thënë se janë më pak se 11 nxënës që e kanë humbur vitin shkollor, por sipas tij nuk ka pasur diskriminim e as racizëm, përkundër kësaj këta nxënës gjatë gjithë vitit shkollor janë trajtuar në mënyrën më të mirë të mundshme.
Drejtori Jashanica deklaron se ka edhe familjar të tij të cilët e kanë humbur vitin shkollor shkaku i mos angazhimeve në procesin mësimor.
“Të gjitha dëshmitë janë të protokolluara se ata fëmijë të komunitetit ashkali nuk e kanë vazhduar mësimin rregullisht dhe nuk janë angazhuar për mësimet shkollore. Po ashtu edhe prindërit e tyre asnjëherë nuk janë angazhuar që të punojnë me fëmijët e tyre dhe të konsultohen me mësimdhënësit. Si drejtor nuk kam të drejtë të ndikoj në procesin e notave dhe po ashtu kam edhe familjar të cilët e kanë humbur vitin dhe nuk kam ndërhy asnjëherë në procese të tilla. Mësimdhënësit e bëjnë një punë profesionale dhe punohet maksimum me secilin nxënës veç e veç”, ka thënë Jashanica.
Jashanica shpjegon se secili mësimdhënës është i gatshëm të sjell dëshmi për secilin nxënës i cili e ka përsëritur vitin shkaku i mungesave dhe mos angazhimit në mësime.
/Telegrafi/