Zv.ministri Sallahu i përgjigjet Deliut për themelimin e Institutit për Krime Lufte

Zëvendësministri i Drejtësisë, Blerim Sallahu ka thënë se Instituti për Krime Lufte ishte mbyllur në vitin 2018 nga zyrtarët e Partisë Demokratike të Kosovës.

Sallahu ka deklaruar se mbyllja e institutit kishte ndodhur me pretendimin se zyrtarët që punuan në këto insitucione nuk patën rezultate, transmeton Telegrafi.

Ai ka shtuar tutje, se kur nuk punojnë personat përgjegjës duhet zëvendësuar me persona që punojnë drejt.

“Në vitin 2018 është mbyllur Instituti për Krime Lufte nga PDK, konkretisht nga ish ministri nga radhët e kësaj partie. Mbyllja e këtij instituti ka ndodhur me pretendimin se zyrtarët që punuan në këtë institucion nuk patën rezultate. Kjo është arsyeja pse është mbyllur instituti nga ish ministri i PDK-së. Është normë universale e cila respektohet në vazhdimësi se, kur nuk punojnë personat përgjegjës zëvendësohen me persona që punojnë drejt dhe angazhohen për përmbushjen e detyrave të punës”, u shpreh ai në postimin e bërë në Facebook.

Tutje, ai ka theksuar se “Po ta marrim parimin e PDK-së se nëse nuk ka rezultate nga personat përgjegjës duhet të mbyllet institucioni e jo të zëvendësohen ata, atëherë shumica e institucioneve në kohën e qeverisjes së PANI-it ishin dashur të mbyllen”.

“Gjithmonë, kjo parti pasaktësinë e ka pas të saktë”.

Ndryshe, deputetja e Partisë Demokratike të Kosovës, Blerta Deliu-Kodra një ditë më parë në një konferencë për media ka folur për themelimin e Instituti për krime lufte.

Ajo ka thënë se me themelimin e këtij Instituti është zgjatur afati kohor i hetimit deri më 31 dhjetor të vitit 2000.

Lexo po ashtu PDK: Në terr dhe fshehtas, Qeveria kontrabandoi mbrëmë dy ligje me të cilat goditi veteranët dhe UÇK-në

Deliu e ka quajtur këtë vendim të Qeverisë si skandal i radhës, për të cilin tha se nuk do të qëndrojnë të heshtur.

“Cilat janë ato krime të cilat kanë ndodhur pas mbarimit të luftës në Kosovë dhe për çfarë krime po flet ky kryeministër, i cili, bashkë me bashkëpartiakët e tij, mbrëmë, në terr, ka marrë një vendim të padinjitetshëm dhe antikombëtar dhe të cilat shkojnë në linjë me fabrikimet kundër UÇK-së. PDK do të jetë konsistente për të ndalur këtë qasje antikombëtare të kësaj Qeverie e cila koordinohet me Radojçiqin– në marrjen e vendime në dëm të interesave të qytetarëve dhe shtetit të Kosovës”, ka përfunduar deputetja Deliu – Kodra. /Telegrafi/