Zjarri në një port në Turqi u shkaktua nga tërmetet, momenti kur aeroplani “futet përmes tymit” për të ndaluar flakët

Disa pamje ajrore tregojnë një tym të dendur dhe të zi që dilte nga një port i djegur në Turqinë jugore të enjten.

Sipas mediave të huaja, përcjell Telegrafi, zjarri në Iskenderun – një nga dy portet kryesore të kontejnerëve në bregdetin jugor të Turqisë në Mesdhe – u shkaktua nga tërmetet shkatërruese të së hënës.

BBC thotë se “dëshmoi” disa aeroplanë që përpiqeshin të shuanin flakët të enjten në mëngjes, një ditë pasi autoritetet thanë se zjarri ishte shuar.

Të gjitha operacionet u mbyllën në port pas tërmeteve dhe firmat kryesore të transportit u detyruan të devijonin anijet e tyre drejt terminaleve të tjera në rajon.

Shërbimet e urgjencës fillimisht e patën të vështirë qasjen në zjarr për shkak të dëmtimeve të shkaktuar nga tërmeti dhe kontejnerëve që bllokuan hyrjen.

Nuk ka ende asnjë informacion se kur porti do të rihapet për anijet ndërkombëtare pasi do t’i duhet t’i nënshtrohet një inspektimi të plotë.

Më shumë se 17,000 njerëz janë konfirmuar se kanë vdekur në tërmetet dhe numri i të vdekurve pritet të rritet ndërsa përpjekjet e shpëtimit dhe rimëkëmbjes vazhdojnë. /Telegrafi/