Zjarr në afërsi të derës së një kishe në Prizren, persona të panjohur tentuan ta djegin

Një person pasi ka vërejtur zjarr në afërsi të derës së një kishe ka reaguar shpejt duke e fikur atë.

Sipas një njoftimi të Policisë së Kosovës bëhet e ditur se ngjarja ka ndodhur të hënën rreth orës 23:09 tek objekti kishtar (kisha ortodokse) “Shën Pantelija”, në rrugën “Haxhi Krasniqi”, në Prizren.

Tutje në njoftim bëhet e ditur se disa persona të panjohur kanë tentuar të djegin derën e hyrjes së këtij objekti.

“Më 17.04.2023 rreth orës 23:09, një qytetar ka vërejtur një zjarr në afërsi të derës së një kishe, ai ka reaguar dhe ka arrit ta fik zjarrin pa u shkaktuar dëme të mëdha. I njëjti ka njoftuar policin se në rrugën ‘Haxhi Krasniqi’ në Prizren, saktësisht tek objekti kishtar ‘Shën Pantelija’- kishë ortodokse, të dyshuar të panjohur kanë tentuar ta djegin derën e hyrjes së këtij objekti”, thuhet në njoftim.

Po ashtu në njoftim thuhet se patrulla policore i është përgjigjur rastit.

“Me të arritur në vendngjarje konfirmojnë se në vendin e ngjarjes kundërmon era e benzinës dhe është një shishe e plastikës që është djegur. Pasi që janë mbledhur provat dhe dëshmitë, në lidhje me rastin është njoftuar Prokurori i Shtetit, i cili ka rekomanduar që të iniciohet rasti ‘Shkaktim i rrezikut të përgjithshëm’”, thuhet ndër të tjera në njoftim. /Telegrafi/