Zemaj kritika Qeverisë Kurti: Nëse vazhdohet me këtë ritëm, Kosovës do t’i duhen më shumë se tri vjet për vaksinimin e popullsisë

Deputeti i LDK-së, njëherësh ish-ministri i Shëndetësisë, Armend Zemaj ka thënë se Kosova ka mbetur prapa në sigurim e vaksinave, dhe se Qeveria Kurti nuk ka plan për menaxhimin e pandemisë.

Ai tha se afati se kur qytetarët duhet të marrin dozën e dytë të vaksinës është 8 qershori. Por që sipas tij, ende nuk ka konfirmim nëse në Kosovë do të arrijnë dozat e dyta të kësaj vaksine.

“Kjo qeveri ka gënjyer qytetarët kur ka thënë se prioritet i saj është gjendja pandemike. I kujtojmë qeverisë se 8 qershori është afati i dozës së dytë të vaksinës po nga i njëjti prodhues AstraZeneca por vaksina nga ky prodhues nuk ka. Donacionet nga vendet mike janë të mirëseardhura. Por qytetarët presin që Qeveria e tyre të kontraktojë kompanitë private sa më parë që të jetë e mundur që furnizimi me vaksina të jetë i bollshëm”, tha Zemaj.

Zemaj shtoi se nëse vazhdohet me këtë ritëm, atëherë Kosovës do t’i duhen deri në tri vite për të përmbyllur procesin e vaksinimit të qytetarëve.

“Për fat të keq kjo nuk ka ndodhur, qytetari është i painformuar nga ata që u zotuan për transparencë e vaksinim të qytetarëve mbi 60% Nëse vazhdohet me këtë ritëm që duket se është larg, Kosovës do ti duhen më shumë se 3 vjet për ta përmbyllur vaksinimin e popullsisë”, tha Zemaj.

Zemaj ka kritikuar Qeverinë edhe për numrin e ulët të testimeve.

“Sasia e testimeve është zvogëluar. Përveç që kanë zvogëluar numrin e testimeve këta qeveritar me gojën plot për mërgatë tonë, po i detyrojnë bashkatdhetarët të testohen në institucione private për arsye të udhëtimit”, u shpreh ish-ministri i Shëndetësisë.

Zemaj shtoi se profesionistët shëndetësorë po anashkalohen dhe përkrahja për ta është zvogëluar.

Ai ka theksuar se LDK-ja kërkon që Qeveria të bëjë hapa konkret për gjendjen e pandemisë dhe shëndetit të qytetarëve, të krijohen kushte për personelin shëndetësor, të bëhet shtimi i pagesave të personelit shëndetësor.

Zemaj tutje shtoi se Qeveria duhet të rris bashkëpunimin me Shqipërinë.

“Qeveria duhet të rris bashkëpunimin me Shqipërinë dhe jo të mbaj inate për daljen nga ky qorrsokak, dhe të hapë rrugë për vaksinimin e atyre qytetarëve që duna të vaksinohen sipas dëshirës në Shqipëri”, tha Zemaj. /Telegrafi/