Zelensky i bën thirrje bashkëkombësve për unitet në prag të Ditës së Pavarësisë: Duhet të luftojmë për fitore

Presidenti ukrainas Volodymyr Zelensky, i ka bërë thirrje bashkëkombësve që të bashkohen dhe të luftojnë në prag të Ditës së Pavarësisë, kur edhe do të mbushen gjashtë muaj nga fillimi i pushtimit rus në këtë vend.

“Duhet të luftojmë për fitore të Ukrainës, kemi akoma shumë punë, duhet të jemi të bashkuar”, shtoi Zelensky në videon e tij më të fundit, me të cilën i drejtohet kombit ukrainas, transmeton Telegrafi.

Ukraina javën e ardhshme – përkatësisht më 24 gusht shënon Ditën e Pavarësisë – e kjo datë njëherit shënon gjashtëmujorin që kur filloi pushtimi rus në Ukrainë.

Lexo po ashtu Gabimet ruse para fillimit të pushtimit të Ukrainës, spiunët e FSB-së e kishin ditur që ukrainasit do t’ju rezistojnë – por nuk i kishin treguar Putinit

Zelensky ka paralajmëruar se si forcat ruse atë ditë mund ta shfrytëzojnë për të kryer sulme brutale.

“I tillë është armiku ynë”, shtoi Zelensky – duke theksuar se terrori rus në Kharkiv dhe Donbas nuk ka të ndalur.

Lexo po ashtu Vajza e mikut të ngushtë të Putinit humb jetën, vetura e saj hidhet në erë – babai shikon mjetin motorik duke u djegur

Ai porositi se ditëve të ardhshme pret vizita të partnerëve të Ukrainës – duke pranuar se “lufta ka ndryshuar gjithçka për Ukrainën, Evropën dhe pjesën tjetër të botës”.

Sipas tij, qëllimi i Rusisë është poshtërimi i Ukrainës, duke përhapur frikë dhe konflikt – kështu që sipas tij nuk duhet të gjunjëzohen dhe të tregojnë pikat e dobëta. /Telegrafi/