Vuçiq nesër në Kosovë, përcillet nga Policia

Kryeministri i Serbisë, Aleksandër Vuçiq pritet që nesër (e diel) ta vizitojë Kosovën, kurse për sigurinë e tij do të përkujdeset Policia e Kosovës.

Ndërkohë, zëdhënësi i PK-së, Baki Kelani ka thënë se organet e sigurisë në vend janë përgjegjëse për ti ofruar përcjellje policore çdo personaliteti dhe niveli të lart që viziton Kosovën.

“Çdo delegacion që vjen në Kosovë dhe posedon leje të autoritete të Replikës së Kosovës , Policia varësisht prej nivelit të delegacionit dhe vlerësimeve të rrezikshmërisë i ofron përcjellje policore”, ka thënë ai për “Zeri.info”

Nga ana tjetër, drejtori i të ashtuquajturës Zyre për Kosovën në Qeverinë e Serbisë, Marko Gjuriq, është shprehur i bindur se kryeministri serb do ta vizitojë Kosovën këtë të diel.

Vuçiq pritet t’i vizitojë disa nga vendet ku banohen me shumicë serbe.

Sipas Gjuriqit, kryeministri do tu drejtohet qytetarëve në Zubi Potok, ndërsa do t’i vizitojë edhe disa vende tjera. Kurse në kohën kur po pritet të ndodhë kjo vizitë, në veri të Kosovës janë vendosur posterë dhe billboard-a, ku i urohet mirëseardhje kryeministrit serb.