Vrasja e Ardian Nikulajt, katër britanikët dhe shqiptari dalin në gjykatën e Londrës

Gjykata e ekstradimeve në Londër e ka vlerësuar të plotë dosjen dërguar nga ministria e Drejtësisë në Shqipëri, për katër britanikët dhe një shqiptarë të cilët kërkohen për vrasjen e biznesmenit, Ardian Nikulaj në Shëngjin me 19 prill 2023.

Data 25 mars është dhe dita kur nis shqyrtimi në themel i kërkesës së shtetit shqiptar për ekstradimin e tyre.

Katër britaniket dhe shqiptari, Edmond Haxhia,  pranuan nisjen e shqyrtimit të kërkesës së Shqipërisë.

Shqyrtimi i dosjes ku ndodhet kërkesa për ekstradim, parashikohet të zgjasë shtatë ditë.

Hetimet e prokurorisë së Lezhës për këtë vrasje kanë mbërritur në përfundimin se katër britanikët erdhën në Shqipëri dhe dyshohet se vepruan për të mbajtur nën vëzhgim viktimën. Ndërkohë, portugezi Ruben Saraiva me nënshtetësi portugeze dhe rezident në Angli, dyshohet se është ekzekutori Nikulajat.

Ai u ekstradua nga Maroku në Shqipëri në fund të vitit 2023.

Shteti shqiptarë do të mësojë për vendimin e gjykatës së Londrës nëse do të jetë në favor apo jo të kërkesës për ekstradimin e pesë të kërkuarve gjatë muajit prill.

Edhe nëse vendimi do të jetë pro ekstradimit, beteja ligjore do të zhvendoset në Gjykatën e Apelit.

Nisur nga këto rrethana, të kërkuarit nga drejtësia shqiptare nuk do të jenë në dispozicion të drejtësisë së vendit tonë deri në fund të këtij viti./RTSH