Një person, 26 vjeç ka kryer vjedhje në një banesë në Vlorë, por pasi është parë nga pronarja e banesës ai ka kërcyer nga ballkoni për të ikur nga vendi i ngjarjes duke marr lëndime trupore.

Sipas një njoftimi të Policisë së Shtetit në Shqipëri, personi është kapur menjëherë dhe është bërë arrestimi i tij.

“Vodhi në banesën e një shtetaseje dhe tentoi të shmangte shërbimet e Policisë që shkuan menjëherë në vendin e ngjarjes, arrestohet në flagrancë autori i dyshuar. 26-vjeçari i arrestuar, i dënuar më parë për veprën penale “Vjedhja” dhe i dyshuar si autor i një vjedhjeje tjetër”, thuhet në njoftim.

Sipas njoftimit, personi ka vjedhur një telefon mobil nga banesa.

“Ky shtetas, gjatë orëve të mëngjesit të ditës së djeshme, dyshohet se ka hyrë në banesën e një shtetaseje dhe pasi ka vjedhur një aparat celular, ka tentuar të largohet pasi është pikasur prej saj. Gjatë tentativës për t’u larguar, 26-vjeçari është hedhur nga ballkoni i banesës (për pasojë ka marrë dëmtime në trup), por nuk ka mundur të largohet pasi është kapur në flagrancë nga shërbimet e Policisë, të cilat kanë shkuar menjëherë në vendin e ngjarjes, pas telefonatës për këtë rast”, thuhet ndër të tjera në njoftim. /Telegrafi/