Vjen reagimi i Pekinit, pasi Trump paralajmëroi vendosjen e tarifave të reja për produktet kineze

Kina ka lëshuar një paralajmërim për Donald Trump për planet e tij për të vendosur tarifa të reja, duke thënë se “askush nuk do të fitojë në një luftë tregtare”.

Presidenti i zgjedhur tha të hënën se do të vendosë një tarifë shtesë prej 10 për qind për produktet kineze që hyjnë në SHBA kur të kthehet në Shtëpinë e Bardhë, duke paralajmëruar se “sasi masive droge” po shpërndahen ende në SHBA, pavarësisht bisedimeve të shumta.

“Kam pasur shumë biseda me Kinën rreth sasive masive të drogës, veçanërisht fentanilit, që dërgohen në Shtetet e Bashkuara – por pa dobi”, shkroi ai në Truth Social, shkruajnë mediat e huaja, përcjell Telegrafi.

“Përfaqësuesit e Kinës më thanë se do të vendosnin dënimin e tyre maksimal, atë të vdekjes, për çdo tregtar droge që kapej duke e bërë këtë, por, për fat të keq, ata nuk e ndoqën këtë, dhe droga po shpërndahet në vendin tonë, kryesisht përmes Meksikës, në nivele të papara më herët”.

“Deri në momentin që ata të ndalojnë këtë, ne do t’i ngarkojmë Kinës një tarifë shtesë prej 10%, mbi çdo tarifë shtesë, për të gjitha produktet e tyre të shumta që vijnë në Shtetet e Bashkuara të Amerikës”.

Duke reaguar ndaj deklaratës së Trump, Liu Pengyu, zëdhënësi i Ambasadës Kineze në SHBA, shkroi në X, dikur në Twitter: “Bashkëpunimi ekonomik dhe tregtar Kinë-SHBA është reciprokisht i dobishëm. Askush nuk do të fitojë një luftë tregtare apo një luftë tarifore”.

“Autoritetet kundër narkotikëve të Kinës dhe SHBA-së kanë rifilluar komunikimin e rregullt që nga Samiti i San Franciskos. Pala kineze ka njoftuar palën amerikane për përparimin e bërë në operacionet e zbatimit të ligjit të SHBA-së kundër narkotikëve. Kina i është përgjigjur kërkesës së SHBA për verifikimin e të dhënave për raste të caktuara dhe masat e marra”, citohet të ketë thënë ai.

Kujtojmë se Trump njoftoi gjithashtu se do të zbatojë tarifa 25 për qind për të gjitha mallrat që vijnë nga Meksika dhe Kanadaja. /Telegrafi/