Vig Poppa njofton se ka nisur studimet në Universitetin e Suedisë

Reperi i njohur shqiptar, Vig Poppa, ka tash e sa kohë që është zhvendosur në Suedi.

Me të shkuar atje, ai bëri një ndryshim drastik të stilit të jetesës – duke humbur shumë kilogramë dhe zhvilluar synime të reja në jetën e tij.

Ai madje ka arritur së fundmi që të regjistrohet në universitetin shtetëror suedez dhe këtë e ka bërë të ditur vet bashkëshortja e tij.

Gruaja e reperit, Anduena, publikoi një fotografi të tij në InstaStory, duke renditur disa nga të arriturat e tij me zhvendosjen në ‘botën skandinave’.

”Dashuria ime, ja dole! U zhvendose në një shtet tjetër, mësove një gjuhë të re, rrite fëmijët, studiove me kohë të plotë dhe tashmë je pranuar universitetin suedez, në katër vjet! Po tallesh? Po fiton në jetë dhe jam tejet e lumtur ta ndaj atë me ty”, shkroi ajo.

E planet për t’u regjistruar në universitet, Vig Poppa, i kishte treguar vitin e kaluar në një intervistë për Telegrafin.

Lexo po ashtu Rikthimi në muzikë, ndryshimi drastik në peshë dhe zhvendosja në Suedi - Vig Poppa rrëfen evolucionin

“Këto dy vitet e fundit jam duke u përgatitur për universitet në fakt. Shkollimi i Kosovës nuk më ka vlejtur asgjë në Suedi edhe shkaku i mos-njohjes së gjuhës mu ka dashur të bë gjithçka prej fillimit, kështu që jam ende në proces të përgatitjes për universitet. Muzikën për momentin e kam lënë pak anash, po gjithsesi do të punoj në muzikë në të ardhmen, sepse krijimi i muzikës është pjesë shumë e madhe e imja qe s’mundem ta injoroj”, kishte thënë reperi, emri i vërtetë i të cilit është Vigan Bardhi.

I njëjti, kishte rrëfyer edhe çelësin e suksesit drejt humbjes së peshës.

“Deri tash i kam humbur 45 kilogramë, me ushtrime e jetesë të shëndetshme. Jeta pa rregull e rutina që e kom pasur në Kosovë e ka bërë shumë të vështirë e të pamundshme për mua të mbaj peshën në rregull e shëndetin optimal. Po tash në Suedi po jetoj ndryshe, po ha, po flej, po ushtroj me rregull edhe e gjithë kjo po rezulton në humbje të peshës edhe në përmirësimin e shëndetit tim në përgjithësi”, kishte thënë ai.

Përndryshe, Vig Poppa dhe Anduena janë prindër të dy fëmijëve. /Telegrafi/