Video nga zhveshtorja e Marseille: Koha kur yjet botërore, si Ribery e Nasri, qëndronin të heshtur kur fliste Cana

Në fillim të sezonit 2005/2006, pas ndërrimit të trajnerit te Paris Saint-Germaini, Lorik Cana kaloi te Marseille, ku qëndroi deri në vitin 2009.

Pasi iu bashkua klubit të ri, ai e siguroi vendin e tij në formacionin startues duke i ndihmuar skuadrës që të konkurronte për titull dhe për kupa. Megjithatë, në dy raste përfunduan si nënkampion dhe si finalistë të Kupës së Francës. Gjatë kohës sa ishte pjesë e Olympique de Marseille, Loriku u shndërrua në një lider dhe figurë motivuese për bashkëlojtarët e tij.

Në të njëjtën skuadër me Canën asokohe ishin edhe emra, si Franck Ribery (i cili ka luajtur te Marseille gjatë viteve 2005-2007) e Samir Nasri (i cili ka luajtur te Marseille gjatë viteve 2004-2008), ndërsa të gjithë i dëgjonin në heshtje këshillat e kapitenit legjendar të Kombëtares së Shqipërisë.

Një kapiten dhe lider i tillë që kur fliste ai edhe yjet e futbollit botëror, ku pos Ribery e Nasri, ishin edhe Steve Mandanda, Gael Givet, Boudewijn Zenden, Mathieu Valbuena, Djibril Cisse e Sylvain Wiltord –qëndronin në heshtje.

Një video që daton nga ajo kohë, e shfaq futbollistin duke u treguar bashkëlojtarëve se duhej të luanin më fort në ndeshjen e radhës, se ata duhej ta respektonin ekipin dhe fanellën e Marseille që ka aq shumë histori. /Telegrafi/