Vetura që humb 73 për qind të vlerës së saj pas vetëm pesë vitesh

Vlera e modeleve të veturave elektrike bie në mënyrë drastike, ndërsa humbja është e vogël për veturat sportive.

Humbja e vlerës së veturës është e pashmangshme, por zgjedhja e modelit mund të ndikojë ndjeshëm në atë se sa automjeti do të humbë vlerën pas një kohe të caktuar.

Një studim i fundit amerikan zbuloi se veturat mund të humbin midis 19.5 dhe 72.2% të vlerës së tyre pas pesë vjetësh, transmeton Telegrafi.

Nuk është sekret se veturat elektrike po humbin me shpejtësi vlerën, siç konfirmohet nga hulumtimi më i fundit i kryer nga iSeeCars.

Mesatarisht, modelet elektrike humbin 58.8% të vlerës së tyre brenda pesë viteve, që është dukshëm më e lartë se rënia mesatare prej 45.6%.

Nga ana tjetër, kamionët dhe hibridët dolën më së miri, duke humbur 40.4 dhe 40.7% të vlerës së tyre në të njëjtën periudhë.

Duke pasur parasysh se vlera e modeleve elektrike është në rënie drastike, nuk është për t’u habitur që ato janë në listën e automjeteve me amortizimin më të lartë.

Jaguar I-Pace zuri vendin e parë, pasi ky crossover elektrik humb 72.2% të vlerës së tij pas pesë vitesh, që përkthehet në një humbje prej 51,953 dollarësh.

Në vendin e dytë është BMW Seria 7, e cila humb 67.1% të vlerës së saj, ose 65,249 dollarë.

Ndër 5 veturat kryesore me amortizimin më të lartë janë:

Tesla Model S – humbet 65.2% të vlerës së saj

Infiniti QX80 – humbet 65.0% të vlerës së tij

Maserati Ghibli – humbet 64.7% të vlerës së tij

Ndryshe nga modelet luksoze dhe elektrike, veturat sportive treguan rënien më të vogël të vlerës pas pesë vitesh.

Porsche 911 u dallua si më e mira në këtë segment, pasi humbi vetëm 19.5% të vlerës së saj, e ndjekur nga Porsche 718 Cayman me një rënie prej 21.8%.

Këto të dhëna tregojnë qartë se blerja e një veture elektrike ose modeli luksoz mund të çojë në një humbje të madhe financiare, ndërsa veturat sportive janë një zgjedhje më e mirë për vlerën afatgjatë. /Telegrafi/