Vetëm Lewandowski është më i mirë se Abraham në vitin 2022

Tammy Abraham është vetëm i dyti pas Robert Lewandowski për golat e shënuar në vitin 2022 në pesë ligat më të mira të Evropës.

Sulmuesi anglez shënoi një dygolësh në fitoren 3-0 të Romës ndaj rivalëve të qytetit Lazio në derbin della Capitale të dielën dhe tani ka 23 gola në 40 paraqitje me Giallorossët.

Ai është sulmuesi më efektiv në Serie A në vitin e ri dhe do të bëhet debutuesi më i mirë në historinë e Romës nëse shënon dy gola të tjerë deri në fund të sezonit.

Lexo po ashtu Abraham i pandalshëm për Romën, por qëndron me këmbë në tokë: Më kanë blerë për të shënuar

Ish-sulmuesi i Chelseat ka shënuar nëntë gola në 11 paraqitje në vitin 2022, një gol çdo 105 minuta. Enes Unal i Getafes ka arritur të njëjtën sasi golash që nga fillimi i janarit dhe vetëm Robert Lewandowski ka më shumë në pesë ligat më të mira të Evropës: 12 në 10 paraqitje, një gol çdo 75 minuta.

Abraham tashmë ka barazuar rekordin e tij personal për golat e ligës në një sezon (15, njësoj si në 2019-20 me Chelsean) dhe u bë lojtari i parë i Romës që shënon dy gola në një derbi që nga Francesco Totti në vitin 2015.

Anglezi iu bashkua Romës nga Chelsea në një marrëveshje prej 40 milionë euro verën e kaluar dhe kontrata e tij në Stadio Olimpico skadon në 2026. /Telegrafi/