Një studim i madh sugjeron se të ecësh 7,000 hapa në ditë, mund të jetë e mjaftueshme për të rritur fuqinë e trurit dhe për të ndihmuar në mbrojtjen nga një sërë sëmundjesh të ndryshme.
Mund të jetë një objektiv më realist sesa 10,000 hapa, i cili shpesh shihet si pikë referimi për t'u arritur, transmeton Telegrafi.
Hulumtimi, i botuar në Lancet Public Health, zbuloi se shifra ishte e lidhur me një rrezik të reduktuar të problemeve serioze shëndetësore, duke përfshirë kancerin, demencën dhe sëmundjet e zemrës.
Gjetjet mund të inkurajojnë më shumë njerëz të gjurmojnë hapat e tyre, si një mënyrë praktike për të përmirësuar shëndetin e tyre, thonë studiuesit.
"Ne kemi këtë perceptim se duhet të bëjmë 10,000 hapa në ditë", thotë autorja kryesore Dr. Melody Ding, që sipas saj "kjo nuk bazohet në prova".
Shifra prej 10,000 hapash mund të gjurmohet në një fushatë marketingu të viteve 1960 në Japoni. Në prag të Lojërave Olimpike të Tokios në vitin 1964, u lançua një markë pedometri e quajtur manpo-kei, që përkthehet si "metër 10,000 hapash".
Dr. Ding thotë se kjo shifër u "nxor jashtë kontekstit" dhe u bë një udhëzues jozyrtar, të cilin shumë gjurmues dhe aplikacione fitnesi vazhdojnë ta rekomandojnë.
Studimi i Lancet analizoi hulumtimet dhe të dhënat e mëparshme mbi shëndetin dhe aktivitetin e më shumë se 160,000 të rriturve në të gjithë botën.
Krahasuar me ata që ecnin 2,000 hapa në ditë, zbuloi se 7,000 hapa lidheshin me rrezik të reduktuar të:
sëmundjeve kardiovaskulare - më pak se 25%
kancerit - më pak se 6%
demencës - më pak se 38%
dhe depresionit - më pak se 22%
Megjithatë, studiuesit thonë se disa shifra mund të jenë më pak të sakta se të tjerat, pasi ato nxirren vetëm nga një numër i vogël studimesh.
Në përgjithësi, shqyrtimi i tyre sugjeron që edhe numërimi modest i hapave prej rreth 4,000 hapash në ditë lidhet me shëndet më të mirë krahasuar me aktivitetin shumë të ulët prej vetëm 2,000 hapash në ditë.
Për shumicën e problemeve shëndetësore, përfitimet tentonin të uleshin përtej 7,000 hapave, megjithëse kishte avantazhe shtesë për të ecur më tej për zemrën.
Shumica e udhëzimeve për ushtrime përqendrohen në kohën e kaluar duke bërë aktivitet fizik në vend të numrit të hapave.
Për shembull, Organizata Botërore e Shëndetësisë thotë se të rriturit duhet të bëjnë të paktën 150 minuta aktivitet aerobik të moderuar ose 75 minuta aktivitet aerobik të fuqishëm çdo javë. /Telegrafi/
