Magazina Yjet

Veshje teatrale nga yjet në “Kënga Magjike 2016” (Foto)

Mbrëmë (e shtunë) është mbajtur nata finale e edicionit të 18-të të festivalit “Kënga Magjike”, e cila u përmbyll me sukses. Fituese e festivalit këtë vit u zgjodh këngëtarja Rozana Radi, për këngën e saj të fuqishme “Ma thuaj ti”.

Përveç Rozanës, në këtë natë finale me çmime u nderuan edhe 20 artistë të tjerë, të cilët njëkohësisht edhe performuan këngët e tyre garuese.

Në një natë me plot 20 performanca nuk ka se si të mos u bie në sy shikuesve edhe paraqitja e yjeve, e cila kësaj radhe ishte më ndryshe nga herët e tjera. Më shumë se kurrë këngëtarët këtë vit i kishin kushtuar kujdes paraqitjes, e cila për pjesën dërmuese të tyre, lirisht mund të themi se ishte dinjitoze.

Shkëlqimi më i madh erdhi nga këngëtaret femra normalisht, të cilat sollën bukuri me elegancën dhe hijeshinë e tyre skenike.

Nuk mund të themi që nuk kishte veshje të bukura këtë vit, por një nga detajet që ra më së shumti në sy nga publiku ishin përzgjedhja e veshjes së artistëve. Thuajse shumica kishin përzgjedhur me kujdes garderobën e cila do t’i përshtatej edhe ambientit ku ata performonin.

Tuna, Flaka Krelani, Elia Zaharia dhe Mariza Ikonomi janë vetëm disa nga emrat që këtë vit kishin përzgjedhur veshjet me elemente teatrale, të cilat sollën tendencën e duhur këtë vit në “Këngën Magjike”, përcjell Telegrafi.

Tuna në natën finale të "Kënga Magjike 2016" — **TUNA**

Këngëtarja shkupjane Tuna mahniti publikun me paraqitjen e saj gjatë interpretimit të këngës “Duam”. E veshur me kostum të zi, pallto të hapur dhe detaje me aksesorë zbukurues në kokë, ajo dukej një artiste e vërtetë! Dhe pa dyshim që kjo është një ndër paraqitjet më të bukura të këtij viti.

Edhe këngëtarja nga Gjakova Flaka Krelani erdhi shpërthyese me interpretimin e këngës së saj “Rebelohem”. Flaka ishte treguar shumë e kujdesshme, dhe në bashkëpunim me stilisten e saj Dona Matoshi kishin përzgjedhur veshjen e duhur për këtë event. Fustani i bardhë me shirit dhe detaje zbukures, i lëshuar me pelerinën mbrapa, i rrinte më së miri bukuroshes së ‘rebeluar’.

Prezanzatuesja e këtij viti, Princeshë Elia Zaharia padiskutim ishte një ndër surprizat më të këndshme të festivalit. Ajo guxoi, dhe mbrëmë iu rikthye muzikës me një performancë të shkëlqyer, ndonëse marrëdhënia e saj me muzikën ishte shkëputur vite më parë me shpërbërjen e grupit “Spirit Voice”. Por marrëdhënia e saj me aktrimin mbetet e njejta, dhe këtë gjë më së miri e vërtetoi edhe me paraqitjen e saj gjatë performancës në skenë. E veshur me një fustan me mëngë të fryra dhe plot shkëlqim, Elia dukej sikur po jepte shfaqjen e saj në teatrin më të bukur të muzikës.

Mariza Ikonomi u vlerësua me një nga çmimet më të veçanta të këtij edicioni. Asaj iu dha çmimi “Best Euro Trend”, i cili e klasifikonte këngën e këngëtares si të veçantë dhe të suksesshme për të gjitha trendet botërore, e cila mund të interpretohej kudo nëpër simfonitë e njohura pa frikën se do nuk do të mirëpritej nga publiku. Por e njëjta ‘kritikë’ vlen edhe për veshjen e saj, e cila ishte e magjishme. Një kostum i zi, i ndërthurur me një pelerinë të bardhë të stilit “Alla Channel”, e bëri të dukej e përsosur këngëtaren, që në fakt ka shpenzuar shumë vite jetesë në qytetin e modës! /Telegrafi/