Vazhdojnë reshjet atmosferike në Kosovë, institucionet për menaxhimin e emergjencave në gjendje gatishmërie

Kryeministri në detyrë i Republikës së Kosovës,  Avdullah Hoti është njoftuar nga Qendra e  Situatave – Këshilli i Sigurisë së Kosovës, se nga reshjet e vazhdueshme atmosferike, në pjesë të caktuara të vendit situata mund të përkeqësohet me mundësi të vërshimeve.

Sipas të dhënave nga Qendra e Situatave, në autostradën Pejë-Prishtinë afër rrethrrotullimit tek aeroporti, ka filluar të ngritët niveli i ujit, por megjithatë autostrada është e kalueshme, thuhet në njoftimin e Qeverisë.

Njësitet e Policisë janë në vendin e ngjarjes në fshatin Kuzmin, ku rruga  është e pakalueshme, niveli i ujit është në rritje dhe mund të rrezikohen disa shtëpi, transmeton Telegrafi.

Lexo po ashtu Priten vërshime të reja në rrafshin e Dukagjinit, por jo të nivelit të lartë

Në Volljakë tek Guri i zi, restorantet janë përmbytur nga uji i Drinit të Bardhë dhe lumi Mirusha.

Në zonën e Malishevës të gjitha rrugët janë të kalueshme por me vështirësi.

Qendra e Situatave – Këshilli i Sigurisë së Kosovës, bën të ditur se të gjitha institucionet e Kosovës janë duke e përcjellë nga afër situatën dhe të gjitha kapacitetet shtetërore janë vënë në gjendje gatishmërie, përfshirë këtu Agjencinë për Menaxhimin e Emergjencave, Shtabet Lokale, Policinë dhe Forcën e Sigurisë së Kosovës, thuhet në njoftim. /Telegrafi/