“Unë mendoj se Erdogan është qesharak”, qytetari arrestohet pas kësaj “kritike” ndaj presidentit turk

Një prononcim për emisionin “Street Cat” të realizuar në qytetin e Rizes, i ka kushtuar qytetarit turk me arrestim dhe burgosje.

Në fakt, qytetari me inicialet E.A. ka përfunduar në burg pasi kishte kritikuar një deklaratë të presidentit, Recep Tayyip Erdogan.

Ky i fundit ditë më parë me rastin e nisjes së punës për hapjen e “Kanalit të Stambollit”, kishte deklaruar se “Ne do të jemi ndër 10 ekonomitë më të mira të botës?”, transmeton Telegrafi.

Lexo po ashtu Erdogan padit për shpifje liderin e opozitës - kërkon dëmshpërblim prej 50 mijë eurove

Në pyetjen se çfarë mendojnë për këtë pohim të të parit të shtetit turk, qytetari ishte përgjigjur ndër të tjera se “Unë mendoj se ai është qesharak” dhe kjo u konsiderua si një vepër penale dhe me këtë rast u arrestua.

Kjo ka bërë që të reagojë edhe kryetari i degës së partisë CHP për Rize, Saltuk Deniz, i cili tha se “Kritikimi i AKP-së po rezulton me ndalime. Këtë e përjetoi E.A. dhe familja e tij”.

Ndryshe, Erdogan sot ka paditur për shpifje kryetarin e opozitës, Kemal Kilicdaroglu, ku ky i fundit kishte kritikuar ashpër presidentin në një fjalim të mbajtur me grupin parlamentar të CHP-së. /Telegrafi/