Ujësjellësi për 10 muaj shkyçi 1200 konsumatorë borxhlinj

KRU “Prishtina” ka njoftuar se nga muaji janar 2018, ka filluar me masa ndëshkuese për të gjithë borxhlinjtë e shërbimeve të ujësjellësit dhe kanalizimit.

Sipas një njoftimi për media, me shkyçje po përballet secili konsumatorë që ka, dy e më shumë fatura të papaguara ndaj shërbimeve të ujësjellësit dhe kanalizimit.

“Ndëshkimi vlen për secilin konsumatorë, shtëpiak e institucional/komercial. Përveç aplikimit të shkyçjeve individuale të konsumatorëve borxhlinj, KRU ‘Prishtina’, po merret edhe me procesimin e lëndëve te Përmbaruesit Privat. Brenda 10 muajve, janë realizuar mbi 1200 shkyçje nga sistemi i rrjetit të ujësjellësit. Vetëm në muajin tetor 2018 janë shkyçë 91 konsumatorë”, ka njoftuar KRU “Prishtina”.

Në shkyçje janë të përfshira tetë komunat në të cilat operon KRU “Prishtina” si : Prishtina, Fushë Kosova, Obiliqi, Podujeva, Shtimja, Drenasi, Lipjani dhe Graçanica, me fshatra përreth.

KRU “Prishtina”i ka ftuar konsumatorët që t;i kryejnë obligimet financiare ndaj kësaj kompanie, ndryshe pason shkyçja. /Telegrafi/