Udhëheqësit botërorë shprehin ngushëllimet dhe ofrojnë ndihmë pas tërmetit vdekjeprurës në Turqi

Mesazhe ngushëllimi dhe mbështetje kanë shkuar të hënën në drejtim të dy vendeve teksa liderët botërorë u zgjuan me lajmin e tërmetit vdekjeprurës që goditi Turqinë dhe Sirinë.

Presidenti ukrainas Volodymyr Zelensky shprehu ngushëllimet e tij për viktimat në Twitter dhe ofroi ndihmë, shkruajnë mediat e huaja, përcjell Telegrafi.

“Ne qëndrojmë me popullin e Turqisë në këtë kohë të vështirë. Ne jemi të gatshëm të ofrojmë ndihmën e nevojshme për të kapërcyer pasojat e fatkeqësisë”, ka thënë Zelensky.

Në Twitter, kryeministri indian Narendra Modi tha se ishte “i prekur nga humbja e jetëve dhe dëmtimi i pronës” nga tërmeti.

“India qëndron në solidaritet me popullin e Turqisë dhe është e gatshme të ofrojë të gjithë ndihmën e mundshme për të përballuar këtë tragjedi”, ka thënë më tej ai.

E kryeministri i Pakistanit, Shehbaz Sharif u dërgoi ngushëllimet e tij njerëzve si në Turqi ashtu edhe në Siri në një sërë postimesh në Twitter.

Numri total i të vdekurve në të dy vendet pas tërmetit është më shumë se 1500 – deri në momentin e publikimit të lajmit.

Ndërkohë presidenti i Izraelit, Isaac Herzog shkroi në Twitter: “Shteti i Izraelit është gjithmonë i gatshëm të ndihmojë në çdo mënyrë të mundshme. Zemrat tona janë me familjet e pikëlluara dhe popullin turk në këtë moment të dhimbshëm”.

Ndërsa këshilltari i Sigurisë Kombëtare i Shtëpisë së Bardhë, Jake Sullivan, tha se Shtetet e Bashkuara ishin “thellësisht të shqetësuara” për shkatërrimin në Siri dhe Turqi.

“Kam qenë në kontakt me zyrtarët turq për të thënë se ne jemi të gatshëm të ofrojmë çdo dhe të gjithë ndihmën e nevojshme. Ne do të vazhdojmë të monitorojmë nga afër situatën në koordinim me Turqinë”, shkroi Sullivan në Twitter.

Misioni diplomatik amerikan në Turqi shprehu gjithashtu “dhimbje të thellë për viktimat tragjike dhe dëmet e mëdha të shkaktuara nga tërmeti” në një postim në Twitter. /Telegrafi/