“U nijke zoni i viktimave në qiell t’u i vra, t’u i masakru”- rrëfimi i dëshmitarit në gjykimin për krime lufte

Në Gjykatën e Prishtinës është mbajtur seanca ndaj të akuzuarit Ekrem Bajroviq, për krime lufte kundër popullatës civile në Komunën e Istogut.

Në seancën e së premtes, më 07.06.2024, është dëgjuar dëshmitari Daut Elshani, i cili rrëfeu për tmerrin dhe maltretimet që kishte përjetuar nga forcat serbe. Ai tha se në mesin e tyre ishte edhe i akuzuari Ekrem Bajroviq.

Daut Elshani rrëfeu në gjykim për majin e vitit 1999. Elshani tregoi se forcat serbe i kishin marrë në kolonë dhe të njëjtit ia kishin vrarë 5 anëtarë të familjes.

“Në vitin 1999 ka ndodhë, na kanë pru në kolonë para masakrës ku u bo, aty janë ardhë policia e m’i kanë zbrit 5 anëtarë, Muhejdinin, Nexhmedinin, Abdullahin, Shemsediun dhe Naimin. I kanë afru edhe i kanë shti në atë oborr të Demë Zeqirit, ku edhe i kanë vra” – rrëfeu dëshmitari Daut Elshani.

Tutje dëshmitari shtoi se kishte pritur disa minuta me shpresën se mos po i liroheshin djemtë e tij.

“Kom nejtë 20 minuta përpara djemtë mos po m’i lëshojnë, ka ardhur Banjaci edhe më ka thënë  ik prej këtuhit edhe unë kam dalë për rrugën në Dobrushë, aty ka qenë një derë me dërrasa edhe kam nejtë 40 minuta me rob e me fëmijë në traktor edhe i kam pa duke m’i rrahur paramilitarët meshkujt” – tregoi dëshmitari i prokurorisë.

Në gjykimin për krime lufte ndaj Ekrem Bajroviq, dëshmitari Elshani tregoi se kishte dëgjuar edhe krismat e armëve.

“Kanë krisë me alltia, u nijke zoni i viktimave në qiell t’u i vra, t’u i masakru, nëse nuk është kështu unë po e marr dënimin e këtij” – shtoi Elshani.

I pyetur nga prokurori i Prokurorisë Speciale, Ilir Morina, se a e kishte parë të akuzuarin Ekrem Bajroviq në ditën kritike.

Dëshmitari potencoi se të akuzuarin Ekrem Bajroviq e kishte parë në oborr.

“Ekremi veç u endke, ka qenë brenda në oborr, herë te njoni herë te tjetri, ka qenë edhe Stojkoviqi, ka pasë edhe policë të tjerë po ata s’i kam njoftë. Ekremi nuk ka qenë civil, më duket i kanë pasë teshat e paramilitarëve, i kam pa armë në dorë, ky është bashkëpunëtor i rrahjes edhe i masakrës, nuk du me ia shtu, veç çka kom pa edhe çka kom ni” – tha në dëshminë e tij Daut Elshani.

Seanca e datës 07.06.2024 u ndërpre për arsye së njëri nga anëtarët e trupit gjykues nuk ka mundur të jetë prezent në seancë për arsye personale.

Ndryshe, në këtë seancë ishte paraparë të dëgjoheshin edhe dy dëshmitarë të tjerë.

Cfarë thotë dosja e prokurorisë?

Sipas aktakuzës, gjatë luftës në Kosovë, në vitet 1998-1999, në Istog dhe në fshatrat përreth, Bajroviq ka kontribuar në aplikimin e masave represive të vrasjes, bastisjes, rrahjes, maltretimit, arrestimit, torturës dhe trajtimit në mënyrë çnjerëzore të popullatës civile.

Këto veprime akuzohet t’i ketë kryer si pjesëtar i forcave policore dhe ushtarake serbe në mënyrë individuale si dhe në bashkëkryerje me persona të tjerë.

Aktakuza thotë se në fshatin Staradran më 08.05.1999 kolona e popullsisë civile që po shkonte në drejtim të Shqipërisë ishte ndalur nga këto forca policore dhe ushtarake serbe, pjesë e të cilave ishte edhe Bajroviq, me ç’rast ishin ndarë djemtë e burrat nga pjesa tjetër e grupit.

Fillimisht atyre u ishin marrë paratë dhe sendet e tjera me vlerë, e më pas ishin vendosur në oborrin e shtëpisë së një personi ku ishin renditur me radhë, me duar të ngritura lart dhe me fytyrë nga muri i oborrit, me ç’rast forcat serbe i kishin sulmuar fizikisht dhe rrahur me mjete të ndryshme, thuhet në aktakuzë.

Gjatë kësaj kohe, sipas aktakuzës, forcat policore dhe ushtarake serbe u ishin drejtuar me fjalët: “Ku e keni NATO-n?” e “Ku e keni UÇK-në?”.

Aktakuza thotë se më pas ishin dërguar në një shtëpi, në të cilën kishin pushkatuar së paku 16 prej civilëve shqiptarë. Vetëm një prej tyre kishte mbijetuar, ndonëse i plagosur.

Ndërkaq, sipas aktakuzës, i akuzuari më 07.05.1999 kishte marrë pjesë në arrestimin, kidnapimin dhe keqtrajtimin e 84 civilëve shqiptarë, të cilët fillimisht i kishin ndarë nga kolona dhe i kishin marrë të gjitha paratë e sendet me vlerë.

Më pas këta persona i kishin dërguar në Gurakovc, në një lokal, në të cilin i kishin maltretuar dhe torturuar në mënyrë çnjerëzore e më pas i kishin transferuar në stacionin policor në Gurakovc.

Sipas aktakuzës, kolonës i ka prirë i akuzuari Ekrem Bajroviq, i cili kishte goditur me pjesën e pasme të automatikut një person në anën e djathtë nën brinjë.

Kurse më pas, sipas aktakuzës, pas vendosjes së civilëve në stacion policor, i kanë torturuar në mënyrë çnjerëzore, dhunë psikike, duke i kanosur për jetë. Më tej në aktakuzë thuhet se përveç lëndimeve të rënda trupore u janë shkaktuar trauma dhe pasoja në shëndet.

Sipas aktakuzës, këto veprime sanksionohen sipas ligjeve vendore si dhe Konventës Ndërkombëtare të Gjenevës, raporton Kallxo.