Në rajonin Bryansk të Rusisë, pas shpërthimit të hekurudhës, treni me derivate ka dalë nga binarët.
Treni përbëhej nga 60 vagonë me derivate të naftës dhe materiale ndërtimore, transmeton Telegrafi.
Sipas të dhënave preliminare, para se të dilte treni nga binarët, hekurudha ishte hedhur në erë.
Në vendin e ngjarjes kishte shpërthyer një zjarr i madh, kurse ekipet e ndihmës së shpejtë dolën në vendin e ngjarjes.
Siç mund të shihet në videot e publikuara më poshtë, 7 apo 8 vagonë dhe lokomotiva janë rrokullisur dhe qëndrojnë jashtë binarëve.
Guvernatori i rajonit, Alexandar Bogomaz në kanalin e tij në Telegram ka shpjeguar se çfarë ka ndodhur.
Sipas hetimeve, në kilometrin e 136 të hekurudhës Bryanks që gjendet në qarkun Unecha, ka shpërthyer një pajisje e mbushur me eksplozivë.
Si pasojë e kësaj, lokomotiva e trenit transportues është rrokullisur dhe ka dalë nga binarët. Nga ky shpërthim nuk ka pasur të lënduar. /Telegrafi/
