Trajtimi i djersitjes së tepërt

Hiperhidroza është sekretim i djersës në sasi më të mëdha se sa organizmi ka nevojë të freskohet. Më së shpeshti është prezente në shuplaka të duarve, shputa, në nënsqetull. Andaj, kjo dukuri për shumicën e personave gjatë aktivitetit të përditshëm shkakton shqetësime serioze dhe pakënaqësi

Prof. Ass. dr. Violeta Zatriqi
kirurge plastike–estetike
tel. 044 136 976

Edhe pse ekzistojnë variacione në djersitje tek personat, shumica e tyre djersiten gjatë aktiviteteve fizike, stresit, shqetësimeve, apo qëndrimit në vende shumë të ngrohta. Rritja e djersitjes në hiperhidrozë është shumë më e madhe dhe e tejkalon djersitjen normale.

Simptomat e djersitjes së tepërt

Simptomat e djersitjes së tepërt mund të ndryshojnë nga një njeri te tjetri. Djersitja është e shpeshtë, e dukshme dhe shqetësuese në shputa, nën sqetulla, në kokë, fytyrë, si dhe pika të djersës në shuplaka dhe shputa.

Shkaktarët

Shkaku i hiperhidrozës qëndron në rregullimin e temperaturës trupore. Trupi ka dy lloj të gjëndrave të djersës. Gjëndrat ekrine të cilat gjenden në tërë trupin dhe hapen direkt në sipërfaqe të lëkurës dhe gjëndrat djersore apokrine me qime të shpeshta siç është pjesa e pasme e kokës nën sqetulla dhe në ije.

Kur të rritet temperatura trupore, sistemi nervor autonom stimulon këto gjëndra për të prodhuar lëngje dhe t’i tajojë në sipërfaqe të lëkurës dhe ka për detyrë ta ftohte trupin duke u avulluar. Ky lëng (djerse) përbëhet më së shumti nga uji, kripa, urea dhe elektroliti.

Sipas tipit, hiperhidroza ndahet në atë fokale dhe të gjeneralizuar.

Hiperhidroza fokale është e lokalizuar më së shpeshti në shuplakë të dorës, shputa të këmbës dhe nënsqetulla me shkaktarë të panjohur. Më së shpeshti është e predisponuar gjenetikisht dhe lajmërohet kryesisht para moshës 20 vjeçare. Ndërpritet gjatë gjumit.

Hiperhidroza e gjeneralizuar përfshinë sipërfaqe të mëdha të trupit. Në qoftë se lajmërohet papritur, shpesh është e lidhur me marrjen e ndonjë medikamenti apo ndonjë sëmundje tjetër apo gjendje, siç është menopauza, niveli i ulët i sheqerit, hipertireoza, leukemia, limfoma, problemet me zemër apo infeksioni.

Komplikimet te djersitja e tepërt

Komplikimet të cilat janë lajmëruar pas djersitjes së tepruar mund të paraqiten në formë infeksioni bakterial apo mykotik si dhe ndryshime lëkurore si pasojë e mbylljes së poreve të lëkurës në afërsi të gjëndrave të djersës.

Tretmani dhe terapia për hiperhidrozë

Injektimi i dozave të përcaktuara të toksinës botulin (botoks) në regjionin përkatës e zvogëlon tajitjen e gjëndrave të djersës. Kjo është një ndër metodat e cila jep rezultatet më të mira. Me anë të kësaj metode bëjmë bllokimin e nervave të cilët aktivizojnë gjëndrat e djersës. Kohëzgjatja e këtij trajtimi është 6 muaj deri një vit.

Botoksi aplikohet në sipërfaqen e lëkurës në regjionet të cilat djersiten më së shumti dhe ky tretman mund të përsëritet pa kurrfarë pasoje në periudha të caktuara kohore. Në regjionin e shpatullës aplikimi i botoksit është i padhembshëm, ndërsa në regjionin e shuplakave pak më i dhembshëm.

Antiperspirantet

Antiperspirantet me klorur të aluminit përdoren tek shkalla e lehtë e hiperhidrozës, e cila aplikohet në mbrëmje. Kjo mund të shkaktojë irritim të lëkurës, andaj duhet në mëngjes të bëhet shpëlarja e lëkurës.

Medikamentet antiholinergike

Aplikohen vetëm tek djersitja e gjeneralizuar. Ato bëjnë bllokimin e lidhjes së acetilkolines dhe japin rezultate përgjatë dy javëve. Efekt anësor i këtij tretmani është paraqitja e tharjes së gojës, kapsllëku, nauzea.

Kirurgjia

Kirurgjia është variant i trajtimit të hiperhidrozës vetëm në raste të rralla. Gjatë ndërhyrjes kirurgjike bëhet prerja e nervave të cilët i përcjellin impulse simpatikusit deri te gjëndrat e djersës. Mund të realizohet përmes endoskopisë torako-simpatektomike.

Kjo metodë kërkon hospitalizim, me ç’rast lihen disa gjëndra diskrete.

Ka efikasitet deri 90%; efekte anësor i kësaj metode është se mund të paraqitet një djersitje e rritur te 60% e pacientëve duke përfshirë kryesisht shpinën, kofshët. Në 10% të rasteve mund të paraqitet rritja e djersitjes gjatë ngrënies së ushqimit- hiperhidroza gustatore.

1% e popullatës vuajnë nga hiperhidroza, prej tyre 60% nuk mbajnë mend se në cilën moshë është paraqitur djersitja e tepërt, 33% e rasteve është paraqitur në periudhën e pubertetit dhe 5% paraqitet tek të rriturit. /Telegrafi/