Tragjedia në Maqedoni u kujtoi shumë njerëzve serialin e Netflix “The Endless Night” – ka një histori të ngjashme

Ngjarja tronditëse në një klub nate në Maqedoninë e Veriut u ka kujtuar shumë njerëzve serialin e Netflix, “The Endless Night”.

Seriali përshkruan historinë e vërtetë të zjarrit katastrofik që shpërtheu në vitin 2013 në klubin e natës ‘Kiss’ në një vend në Brazil, Santa Maria.

Në atë tragjedi humbën jetën 242 persona, kryesisht studentë të rinj nga mosha 18 deri në 30 vjeç, ndërsa mbi 600 pësuan lëndime të rënda.

Zjarri shpërtheu pasi një anëtar i grupit ndezi fishekzjarre gjatë një shfaqjeje dhe flakët u kapën nga materiali në izolimin e tavanit.

Tema e serialit e realizuar në vitin 2022, fokusohet në pasojat e tragjedisë, duke përshkruar luftën e prindërve dhe familjeve të viktimave për të arritur drejtësinë, përgjigjet dhe njohjen e përgjegjësisë.

Seriali detajon sa shumë kanë dështuar institucionet, nga kontrolli i dobët i kushteve të sigurisë në klub, tek mungesa e daljeve adekuate emergjente, te korrupsioni dhe proceset e ngadalta gjyqësore që kanë lënë në agoni familjet e viktimave prej vitesh.

Lexo po ashtu Pamjet e fundit të anëtarëve të grupit të DNK-së para se të vdisnin në zjarrin në Maqedoni

Në pesë episode, shikuesit ndjekin historitë personale të të mbijetuarve, familjarëve dhe miqve të viktimave, duke parë traumat e tyre, por edhe luftën e tyre të palodhur për të vërtetën dhe drejtësinë. Nata e pafund është një përshtatje e librit të vlerësuar me çmime ‘Todo Dia a Mesma Noite’ nga gazetarja braziliane Daniela Arbex, e cila përmes kërkimit të saj dha një përshkrim të plotë të tragjedisë dhe pasojave të saj.

Arbex kaloi vite duke folur me të mbijetuarit, familjet e viktimave, mjekët, zjarrfikësit dhe dëshmitarët e tjerë kyç për të rindërtuar ngjarjet e asaj nate fatale dhe për të sqaruar se çfarë shkoi keq. Libri ka fituar ndikim të madh në Brazil, sepse jo vetëm që përshkruan historinë e një prej tragjedive më të mëdha civile të vendit, por gjithashtu ekspozon dështimet dhe neglizhencën serioze që e bënë të mundur tragjedinë.

Filmi i drejtuar nga Julia Rezende, dhe me aktorë si Bianca Comparato, Paolo Oliveira dhe Thela Martins, të cilët japin bindshëm interpretime të shtresuara dhe prekëse të njerëzve nga tragjedia. Seriali u filmua në vende autentike në Brazil dhe ekipi i prodhimit bashkëpunoi me të mbijetuarit dhe familjet e viktimave për të siguruar që portretizimi të ishte sa më i saktë dhe dinjitoz.

“Endless Night” ofrohet në Netflix, në portugalisht, me titra në shumë gjuhë, duke përfshirë kroatishten. Edhe pse është një serial, shumë shikues theksojnë se përvoja e shikimit lë gjurmë të thella dhe nxit reflektimin mbi përgjegjësinë e shoqërisë, institucioneve dhe individëve në parandalimin e tragjedive të ngjashme. /Telegrafi/