Tifozët e klubit irakian Zakho SC janë shpallur fitues të Çmimit të FIFA-s për Tifozë për vitin 2025, falë një gjesti të jashtëzakonshëm humanitar që mori vëmendje ndërkombëtare.
Mbështetësit e Zakho SC u dalluan para ndeshjes kundër Al-Hudood, më 13 maj, kur hodhën mijëra lodra në fushë si shenjë solidariteti.
Lodrat u mblodhën përpara fillimit të takimit dhe më pas u dhuruan fëmijëve që vuajnë nga sëmundje të ndryshme, duke sjellë emocione të forta dhe duke dhënë një mesazh të fuqishëm humanizmi përmes sportit.
Ndërkohë, Çmimi i FIFA-s për “Fair Play” për vitin 2025 iu dha Andreas Harlas-Neuking, mjekut të skuadrës gjermane Jahn Regensburg.
Ai u vlerësua për veprimin e tij heroik, pasi shpëtoi jetën e një tifozi gjatë një ndeshjeje në muajin prill, duke reaguar menjëherë në një situatë emergjente.
Këto dy çmime dëshmojnë se futbolli nuk është vetëm lojë dhe konkurrencë, por edhe solidaritet, humanizëm dhe përgjegjësi njerëzore. /Telegrafi/
