Thaçi pas takimit me Metën: Qytetarët e Kosovës të pajisen me pasaportën e Shqipërisë, e vetmja shpresë të lëvizin lirshëm (Video)

Presidenti i Kosovës, Hashim Thaçi në një konferencë të përbashkët për media me presidentin e Shqipërisë, Ilir Meta tha se bashkësia ndërkombëtare e ka sjellë Kosovën në izolim klasik, dhe e vetmja shpresë që qytetarët e Kosovës të lëvizin lirshëm është që në përputhje me Kushtetutën e Kosovës dhe të Shqipërisë të pajisen me pasaportë shqiptare.

Thaçi tha se në mënyrë që studentët dhe biznesmenët të mund të lëvizin lirshëm ata në përputhje me Kushtetutën e Kosovës dhe të Shqipërisë të pajisen me pasaportë shqiptare.

Presidenti i vendit tha se pas gjithë këtyre proceseve që ka kaluar Kosova, qytetarët aktualisht janë të izoluar dhe të paperspektivë.

Ndërkaq, lidhur me izolimin e Kosovës ka folur edhe presidenti shqiptar.

Meta tha se nuk mund të ketë pozitë më të vështirë se pozita e presidentit të Shqipërisë në këtë periudhë.

“Theksoj domosdoshmërinë e dhënies fund të këtij izolimi”, tha Meta, duke shtuar se qytetarët e Kosovës janë të vetmit në Ballkanin Perëndimor që nuk e gëzojnë lirinë e lëvizjes.

Ai tha se kushtëzimi i liberalizimit të vizave për Kosovën me demarkacionin me Malin e Zi është i padrejtë.

Në fund të konferencës, Meta tha se zgjidhja nuk është te dhënia e pasaportës për të gjithë qytetarët e Kosovës, pavarësisht nga dëshira për të kaluar këtë problem, jo për shkak të mungesës së dëshirës nga ana e tij, apo e institucioneve të Shqipërisë, por zgjidhja është të tejkalohet ky problem.

“…Shpresoj që edhe politika në Kosovë, pas zgjedhjeve të afërta vendore në një dialog edhe më aktiv me Bashkimin Evropian dhe Malin e Zi të zhbllokohet kjo çështje, sepse nuk bëhet fjala vetëm për vizat, por për zhbllokimin e gjithë perspektivës evropiane të Kosovës…”, tha ai. /Telegrafi/