Thaçi: Dialogu nuk guxon të rrëshqas në nivel teknik, pa praninë e SHBA-ve nuk mund të ketë njohje reciproke

Presidenti i vendit, Hashim Thaçi ka thënë se procesi i dialogut me Serbinë nuk guxon assesi të rrëshqas në nivel teknik.

“Në këtë takim diskutuam për çështjen e dialogut me Serbinë. E kam mirëpritur emërimin e z.Hyseni si koordinator shtetëror të Kosovës në dialogun me Serbinë. Është në interes që të ndodh ky dialog, sepse vetëm me dialog Kosova mund të ec drejt perspektivës evropiane. Në të njëjtën kohë ne duhet ta ruajmë dhe ta forcojmë identitetin tonë shtetëror, dhe në asnjë rrethanë mos të lejojmë që ky proces të zbres në nivel teknik, sepse raporti Kosovë-Serbi është kryekëputë politik”, ka thënë Thaçi, shkruan Telegrafi.

Presidenti ka theksuar se me kryeministrin Avdullah Hoti do të bëjnë përpjekje që të ndërtojnë një konsensus të gjerë që të gjithë të japim kontributin dhe t’i marrim përgjegjësitë në këtë proces.

Thaçi shtoi se aty ku nuk janë SHBA-të, është skeptik se mund të ndodhë njohja reciproke.

“Jetike për ne si Kosovë është që në tavolinë dhe në procesin udhëheqës të jenë SHBA-të natyrisht edhe Bashkimi Evropian”, tha presidenti Thaçi.

Më tej presidenti theksoi se askush i vetëm nuk mund ta çoj këtë proces përpara.

“Partnerët e koalicionit e kanë në përgjegjësinë e tyre deklarimet dhe veprimet. Unë ftoj që të ketë më tepër unitet të veprojmë edhe më të bashkuar e jo vetëm të tejkalojmë çdo ide që mund të frenojë procesin po që të zgjerohet ehe kjo punë edhe me akterë tjerë jashtë koalicionit, të kemi përfshirje më të gjerë të spektrit politik parlamentar, askush vetëm nuk mund ta qoj këtë proces përpara. Në këtë drejtim shoh angazhimin e kryeministrit që të kontaktoj me të gjithë”, tha Thaçi.

Sa i përket emërimit të Skender Hysenit në pozitën e koordinatorit shtetëror për dialog, Thaçi theksoi se ai ka përvojën e tri dekadave.

“Ka qenë njëri ndër bashkëpunëtorët më të ngushtë të presidentin Rugova. Ajo memorie institucionale është ndihmuese dhe kontribuues dhe për spektrin politik”, tha Thaçi.

Presidenti theksoi se gjatë këtij takimi është folur edhe për tejkalimin e situatës me pandeminë COVID-19, si dhe për zhvillimin ekonomik dhe pakon e rimëkëmbjes ekonomike. /Telegrafi/