Thaçi: Batalioni “Atlantiku” ishte vetë beteja dhe fronti i UÇK-së

Presidenti i Kosovës, Hashim Thaçi, në akademinë për 20 vjetorin e themelimit të Batalionit “Atlantiku”, ka thënë se ardhja e këtij Batalioni është mesazh që dërgohet edhe për respektimin e së kaluarës së përbashkët, edhe për përgjegjësitë e forcimit të pozitës së shtetit të Kosovës dhe pozitës së shqiptarëve në rajon.

“Kjo ardhje dëshmon edhe përgjegjësinë e thellimit dhe të kujdesjes për raportet e përjetshme me SHBA-në. Ju keni qenë luftëtarë, komandantë të UÇK-së, ju jeni krenaria dhe heronjtë e Kosovës por edhe jeni veteranët e luftës së SHBA-së. Ne iu jemi gjithmonë mirënjohës juve, familjeve tuaja dhe gjithë bashkëluftëtarëve e veprimtarëve. Vlera e luftës dhe UÇK-së na bashkon të gjithëve përtej çdo partie, ideologjie, dhe lokaliteti. Batalioni “Atlantiku” është sinteza reprezentative e rrethit apo katër fazave të marrëdhënieve të shqiptaro-amerikanëve në atdheun dhe në SHBA”, ka thënë ai, transmeton Telegrafi.

Sipas tij shqiptarët e Amerikës kanë luajtur rol të jashtëzakonshëm në afirmimin e çështjes së Kosovës.

“Të parët tuaj dhe ju shkuat në SHBA, në atdheun e madh të lirisë dhe demokracisë. Shqiptarët e Amerikës kanë luajtur rol të jashtëzakonshëm në afirmimin e çështjes së Kosovës. Në çastet më të vështira ishte krejtësisht i natyrshëm reagimi juaj sepse ju e dinit kuptimin e thellë të lirisë. Batalioni “Atlantiku” është treguesi më i qartë i historisë së shqiptarëve, prandaj ju iu përgjigjët më së miri kushtrimit atdheu në rrezik, vendlindja thërret. Ju nga mirëqenia erdhët direkt në istikamet e luftës. Jeni vetë beteja dhe fronti i UÇK-së. Ju luftuat drejtpërdrejt përballë forcave pushtuese të Serbisë. Misionin tuaj ndaj atdheut e kryet ballë-hapur dhe krenar. Erdhët si vullnetarë u bëtë luftëtar të jashtëzakonshëm dhe fitimtar të luftës për çlirimin e Kosovës”,ka theksuar ai.

Thaçi ka thënë se u janë mirënjohës edhe vëllezërve Bytyçi që ishin pjesë e këtij Batalioni.

“Së bashku me ndihmën e NATO-së, ju realizuar misionin më të lartë kombëtar dhe patriotik. Ju hytë në Kosovë me ajrin e lirisë. Në mbyllje të fazës së katërt pas lirisë ju u kthyet prapë në SHBA tek familjet tuaj, puna dhe biznesi. U jemi mirënjohës për jetë dhe përkulemi me respekt para vëllezërve Bytyçi, heronjëve të Batalionit “Atlantiku” “, është shprehur Thaçi./Telegrafi/