“Termokos” nis sot sezonin e ngrohjes

“Termokos”, ashtu siç edhe ka paralajmëruar, do të nisë sot sezonin e ri të ngrohjes në kryeqytet.

Në një komunikatë për media thuhet se pjesa më e madhe e punimeve për rehabilitimin e rrjetit në qytet dhe renovimi komplet i 50 nënstacioneve të ngrohjes tanimë kanë përfunduar.

“Ditëve të fundit janë zhvilluar me sukses të plotë edhe të gjitha testimet e rrjetit të kogjenerimit, atij shpërndarës të ngrohjes në qytet, si dhe pajisjeve të ngrohjes nëpër stacionet dhe nënstacionet termike. Për shkak se punimet në dy segmente nuk kanë përfunduar ende, furnizimi me ngrohje për kompleksin universitar dhe disa objekte në qendër të qytetit, blloqet, rruga 3 si dhe në Zona Lindja, në lagjen “Kodra e diellit” do të nisë me disa ditë vonesë”, thuhet në njoftim.

Në komunikatën e Termokosit thuhet se bazuar në të gjitha përgatitjet e deritanishme, janë të bindur se edhe në sezonin e ri, që po nisin do të ofrojnë ngrohje të mjaftueshme dhe cilësore për afro 13 konsumatorë.

“Në harmoni me Ligjin për ngrohje dhe “Rregullat për kushtet e përgjithshme të furnizimit me energji” të ZRRE-së, furnizimi me ngrohje do të bëhet varësisht nga kushtet klimatike”, thuhet në fund të njoftimit./Telegrafi/