Të shtëna gjatë festimit të Krishtlindjeve Ortodokse në Istog, arrestohet një person dhe sekuestrohen armë

Një person është arrestuar në Istog, nën dyshimin se ka kryer veprat penale “Mbajtje në pronësi, kontroll ose posedim të paautorizuar të armëve” dhe “Përdorim i armës apo mjetit të rrezikshëm”.

Sipas njoftimit të Drejtorisë Rajonale të Policisë në Pejë, ngjarja ka ndodhur më 7 janar 2025, rreth orës 10:00, kur disa persona ishin duke festuar Krishtlindjet Ortodokse në fshatin Cerkolez të Istogut dhe duke shtënë me armë.

“Njësitet relevante të Stacionit Policor në Istog kanë identifikuar të dyshuarin, i cili kishte shtënë me armë,” thuhet në njoftimin e policisë.

Gjatë intervistimit, i dyshuari ka pranuar se kishte edhe armë të tjera në shtëpi.

Pas koordinimit me Prokurorin e Shtetit, gjatë kontrollit në shtëpinë e tij, janë sekuestruar disa armë: një armë pistoletë CZ 75B, dy karikatorë të po të njëjtës armë, një pushkë gjysmë automatike M57 7.62mm dhe një  pushkë gjuetie.

“Pas procedurave të hetimit dhe sekuestrimit të armëve, i dyshuari është arrestuar dhe po mbahet në qendër të paraburgimit,” njofton Policia e Kosovës. /Telegrafi/