Të rinjtë e Prizrenit përmes Kampit Global treditor përfitojnë njohuri rreth lidershipit

Në Këndin Amerikan në Prizren, të mërkurën, ka filluar Kampi Global (Camp Global), një aktivitet i  dedikuar për të rinjtë që sivjet zhvillohet rreth temës “Gjenerimi i ndryshimit”, me përqendrim në ndërtimin e aftësive të lidershipit.

Pas përvojave të realizimit të këtij kampi në mënyrë virtuale me të rinjtë e Prishtinës dhe të Prizrenit, në saje të bashkëpunimit të Gulf Coast Diplomacy dhe Këndit Amerikan në Prishtinë, tani ky kamp realizohet me pjesëmarrje fizike, raporton Telegrafi.

Drejtoresha ekzekutive e Gulf Coast Diplomacy, Jena Melançon, ka sqaruar se Kampi Global (Camp Global) si një kamp i lidershipit për të rinjtë, ka filluar në vitin 2020, dhe se fillimisht është mbajtur në mënyrë virtuale, në bashkëpunim me Këndin Amerikan në Prishtinë, derisa prej vitit të shkuar është përfshirë edhe Këndi Amerikan në Prizren.

“Në këtë kamp, pjesëmarrësit e rinj njihen me atë se çfarë do të thotë që të jesh lider, çfarë aftësish kanë brenda vetes që paraqesin lidership, sikurse edhe me llojet e ndryshme të liderit. Po ashtu njihen me planet e veprimit, që mund të përdoren në shtëpi, shkollë, me familjen, apo në punësim. Pos kësaj shqyrtojmë edhe kreativitetin, dhe cilat gjëra e cytin kreativitetin”, ka thënë Melançon.

Sipas saj njohuritë në këtë drejtim janë të rëndësishme për këtë grup moshë.

“Është e jashtëzakonshme të kesh ëndrra, por nëse nuk ke një plan nuk do të arrish realizimin e ëndrrave”, ka deklaruar ajo.

Melançon ka pohuar se është mjaft e emocionuar me mundësinë që të realizojë kampin me të rinjtë kosovarë me pjesëmarrje fizike pasi për dallim prej virtuales ka më shumë ndërveprim.

Por sipas saj në saje të këtij bashkëpunimi me të rinjtë nga Prishtina dhe Prizreni krijohen mundësi edhe për realizimin e programeve tjera virtuale me Gulf Coast Diplomacy, që mundëson rrjetëzimin e të rinjve të Kosovës me ata të ShBA-së, por edhe me të rinjtë e shteteve tjera, raporton Telegrafi.

Koordinatori i Këndit Amerikan në Prizren, Besart Osmani është shprehur i kënaqur me interesimin e mbi 20 të rinjve për këtë kamp, që zhvillohet për dy ditë në Prizren dhe në ditën e tretë aktivitetet realizohen në Prishtinë.

“Ky kamp është një mundësi e mirë për pjesëmarrësit e rinj që të përfitojnë njohuri të reja për lidership, komunikim dhe angazhim në komunitet, por edhe të krijojnë përvoja të reja të bashkëpunimit”, ka thënë Osmani.

Kampi Global (Camp Global) me pjesëmarrje fizike realizohet për herë të parë në Prizren, derisa në Prishtinë është organizuar edhe vitin e shkuar. /Telegrafi/